ନୂଆଦିଲ୍ଲୀ: ଭାରତୀୟ ରେଲୱେକୁ ଖୁବଶୀଘ୍ର ମିଳିବ ଆଉ ଏକ ବଡ ଉପଲବ୍ଧି । ଦେଶର ପ୍ରଥମ କେବୁଲ ବ୍ରିଜ ନିର୍ମାଣ କରି ସ୍ଥାପନ କରିବ ନୂଆ ରେକର୍ଡ । କଶ୍ମୀର କଟରା ବନିହାଲ ରେଳ ଟ୍ରାକରେ ନିର୍ମାଣ ହେଉଛି ଏହି ପ୍ରଥମ କେବୁଲ ରେଳ ବ୍ରିଜ ଯାହା ଶୀଘ୍ର ଶେଷ ହେବ ବୋଲି ଟ୍ବିଟ କରି ସୂଚନା ଦେଇଛନ୍ତି ରେଳମନ୍ତ୍ରୀ ପିୟୁଷ ଗୋଏଲ ।
ରେଳମନ୍ତ୍ରୀଙ୍କ ସୂଚନା ଅନୁସାରେ, ଜମ୍ମୁ-କଶ୍ମୀର ମାତା ବୈଷ୍ଣୋଦେବୀଙ୍କ ବେସ କ୍ୟାମ୍ପ କଟରା ଓ ରିୟାସି ମଧ୍ୟରେ ଏହି ବ୍ରିଜ ନିର୍ମାଣ ହେଉଛି । ଏହି ଅଞ୍ଜି ବ୍ରିଜ ଚେନାବ ନଦୀ ଉପରେ ନିର୍ମାଣ ହେଉଥିବା ବେଳେ ସ୍ଥାନୀୟ ଭୌଗୋଳିକ ଦୃଷ୍ଟିରୁ ବ୍ରିଜ ନିର୍ମାଣରେ ନିୟୋଜିତ ଥିବା କର୍ମଚାରୀ ଓ ଇଂଞ୍ଜିନିୟରଙ୍କ ପାଇଁ ବଡ ଆହ୍ବାନ ସୃଷ୍ଟି କରିଛି । ତଥାପି ଭାରତୀୟ ରେଳବାଇର ଇଂଞ୍ଜିନିୟର ଓ କର୍ମଚାରୀମାନେ ଉନ୍ନତମାନର ଜ୍ଞାନକୌଶଳ ବ୍ୟବହାର କରି ଅଞ୍ଜି ବ୍ରିଜ ତଥା ଦେଶର ପ୍ରଥମ କେବୁଲ ବ୍ରିଜକୁ ଶେଷ କରିବାକୁ ଲାଗିଛନ୍ତି ।
ରେଲୱେର ସୂଚନା ଅନୁସାରେ ଦେଶର ପ୍ରଥମ କେବୁଲ ରେଳ ବ୍ରିଜ 473.25 ମିଟର ଲମ୍ବା ହେବ । ଯାହା କଟରାରୁ ରିୟାସି ପର୍ଯ୍ୟନ୍ତ ଯୋଗାଯୋଗ କରିବ। କେବୁଲରେ ନିର୍ମିତ ହେଉଥିବା ଏହି ବ୍ରିଜ ପାଇଁ ଏକ ଉଚ୍ଚ ଖମ୍ବ ନିର୍ମାଣ ହେଉଛି । ଖମ୍ବର ଉଭୟ ପାର୍ଶ୍ବରେ କେବୁଲ ବନ୍ଧାଯିବ। ଏହି ବ୍ରିଜର ନିର୍ମାଣ ଦାୟିତ୍ବ କୋଙ୍କଣ ରେଲୱେ କର୍ପୋରେସନକୁ ଦିଆଯାଇଛି ।