ନୂଆଦିଲ୍ଲୀ: ଭାରତୀୟ ସେନାକୁ ମିଳିଛି ସବୁଠାରୁ ଶକ୍ତିଶାଳୀ ଅସ୍ତ୍ର । ସ୍ବଦେଶୀ ଜ୍ଞାନକୌଶଳରେ ନିର୍ମିତ ‘ଧନୁଶ’ ତୋପ ସେନାରେ ସାମିଲ ହୋଇଛି । ଦେଶର ସବୁଠାରୁ ଶକ୍ତିଶାଳୀ ତୋପ ଭାବେ ଏହା ପରିଚିତ ।
ରିପୋର୍ଟ ଅନୁସାରେ ଶୁକ୍ରବାର ସେନାକୁ ଏହା ହସ୍ତାନ୍ତର କରାଯାଇଛି । ଏହା ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନକୌଶଳରେ ନିର୍ମିତ । ଏହି ତୋପ ମଧ୍ୟପ୍ରଦେଶ ଜବଲପୁରର ଗନ କ୍ୟାରେଜ ଫ୍ୟାକ୍ଟ୍ରିରେ ନିର୍ମାଣ କରାଯାଇଛି । ଏହାକୁ ବୋଫର୍ସ ତୋପର ସ୍ୱଦେଶୀ ସଂସ୍କରଣ ବୋଲି କୁହାଯାଏ । ମାର୍ଚ୍ଚ ଶେଷ ସୁଦ୍ଧା 6ଟି ତୋପ ସେନାକୁ ମିଳିବ ବୋଲି ଜଣାପଡିଛି ।
ସେନାରେ ସାମିଲ ହେବା ପୂର୍ବରୁ ଏହାର ବିଭିନ୍ନ ପରୀକ୍ଷା କରାଯାଇଥିଲା । ଲଗାତାର ୪ ବର୍ଷ ଧରି ତୋପର ପରୀକ୍ଷା ଚାଲୁଥିଲା । ୧୫୫ ଏମଏମ ଇଣ୍ଡିଜିନିୟସ ଆର୍ଟିଲେରୀ ଗନ ଧନୁଶ ତୋପ ସମସ୍ତ ପରୀକ୍ଷାରେ ପାସ ହୋଇଛି । ଏହି ତୋପ ନିର୍ମାଣ ପାଇଁ ୨୦୧୧ରୁ 2014 ପର୍ଯ୍ୟନ୍ତ କାମ ଚାଲିଥିଲା ।
‘ଧନୁଶ’ ତୋପ ଏବେ ଦୁନିଆର ସବୁଠାରୁ ଆଧୁନିକ ଓ ଶକ୍ତିଶାଳୀ ତୋପ ମଧ୍ୟରୁ ଅନ୍ୟତମ ବୋଲି କୁହାଯାଉଛି । ସମସ୍ତ ପ୍ରକାର ପାଗରେ ଏହାର ପରୀକ୍ଷଣ କରାଯାଇଛି । ପୋଖରନରେ ହୋଇଥିବା ଆର୍ଟିଲେରୀ ଗନ ଟେଷ୍ଟକୁ ମଧ୍ୟ ଏହା ପାର କରିଥିଲା । ତେବେ ଫେବୃୟାରୀରେ ଫ୍ୟାକ୍ଟ୍ରିକୁ ୧୧୪ଟି ଧନୁଶ ତୋପ ନିର୍ମାଣର ଅର୍ଡର ମିଳିଛି ।
