ନୂଆଦିଲ୍ଲୀ: ଲଦାଖ ସୀମାରେ ଉତ୍ତେଜନା ମଧ୍ୟରେ ଚୀନକୁ କାଉଣ୍ଟର ଆଟାକ୍ କରିବା ପାଇଁ ବଡ ପଦକ୍ଷେପ ନେଇଛି ଭାରତ । ମିଆଁମାରରେ 6 ଆରବ ଡଲାରର ତୈଳ ବିଶୋଧନାଗାର ତଥା ପେଟ୍ରୋଲିୟମ ରିଫାଇନାରୀ ପ୍ରତିଷ୍ଠା କରିବାକୁ ଭାରତ ପକ୍ଷରୁ ପ୍ରସ୍ତାବ ଦିଆଯାଇଛି ।
ଅଧିକାରୀଙ୍କ କହିବା ଅନୁଯାୟୀ ଭାରତୀୟ ତୈଳ ନିଗମ ଲିମିଟେଡ (IOCL) ଏହି ପ୍ରକଳ୍ପ ପ୍ରତି ଆଗ୍ରହ ଦେଖାଇଛି | ଏହି ପ୍ରକଳ୍ପ ଉଭୟ ଭାରତ ଏବଂ ମିଆଁମାର ପାଇଁ ଲାଭଦାୟକ ପ୍ରମାଣିତ ହେବ ବୋଲି ସେ କହିଛନ୍ତି। ମିଆଁମାରର ଶକ୍ତି କ୍ଷେତ୍ରରେ ଚୀନ ଏକାକି 70 ପ୍ରତିଶତ ବିଦେଶୀ ପୁଞ୍ଜି ବିନିଯୋଗ କରିଥାଏ । ହେଲେ ସେଠାରେ ସ୍ବଳ୍ପ ରିଫାଇନାରୀ ରହିଛି । ମିଆଁମାର ମୁଖ୍ୟତଃ ଘରୋଇ ବ୍ୟବହାର ପାଇଁ ତୈଲ ଆମଦାନୀ କରିଥାଏ ।
ଭାରତର ପଡୋଶୀ ଦେଶଗୁଡିକରେ ନିବେଶ କରି ନିଜର ସ୍ଥିତି ମଜବୁତ କରି ପରେ ସେହି ଦେଶକୁ ନିଜର କୂଟନୀତି ପାଇଁ ମୋହରା ବନାଇଥାଏ ଚୀନ । ତେବେ ଚୀନର ଏପରି ଆଭିମୁଖ୍ୟକୁ କଡା ଟକ୍କର ଦେବାକୁ ଅଣ୍ଟା ଭଡିଛି ଭାରତ ।
ଦୁଇ ଦିନିଆ ମିଆଁମାର ଗସ୍ତରେ ଅଛନ୍ତି ଭାରତୀୟ ସେନା ମୁଖ୍ୟ ମନୋଜ ମୁକୁନ୍ଦ ନର୍ଭାଣେ ଏବଂ ବୈଦେଶିକ ସଚିବ ହର୍ଷବର୍ଦ୍ଧନ। ଏହି ଅବସରରେ ମିଆଁମାର ସହ ଅନେକ ଗୁରୁତ୍ବପୂର୍ଣ୍ଣ ବିଷୟ ଉପରେ ଚୁକ୍ତି ହୋଇଛି ।
