ନୂଆଦିଲ୍ଲୀ: ସୀମା ବିବାଦର ସମାଧାନ କରିବାକୁ ମାଲ୍ଡୋରେ ଭାରତ-ଚୀନ ମଧ୍ୟରେ ହୋଇଥିବା ଆଲୋଚନା ବିନା କୌଣସି ନିଷ୍କର୍ଷରେ ଶେଷ ହୋଇଯାଇଛି । କର୍ପସ କମାଣ୍ଡରସ୍ତରୀୟ ଏହି ଆଲୋଚନା ପାଖାପାଖି 14 ଘଣ୍ଟା ଯାଏଁ ଜାରି ରହିଥିଲା । ହେଲେ ସୀମାରେ ଗତ 4 ମାସରୁ ଜାରି ଉତ୍ତେଜନାକୁ କମ କରିବା ପାଇଁ ସମାଧାନର ରାସ୍ତା ବାହାରି ନାହିଁ । ହେଲେ ଦୁଇ ଦେଶ ଆପୋଷ ବୁଝାମଣା ପାଇଁ ଆଲୋଚନା ଜାରି ରଖିବା ଉପରେ ସହମତି ପ୍ରକାଶ କରିଛନ୍ତି ।
ସୂଚନା ଅନୁଯାୟୀ ବିବାଦ ଏବେ ଗମ୍ଭୀର ସ୍ଥିତିରେ ରହିଛି । ଏଥିପାଇଁ ଭାରତ ଓ ଚୀନ ମଧ୍ୟରେ ଆଲୋଚନା ବିଭିନ୍ନ ପର୍ଯ୍ୟାୟରେ ଜାରି ରହିବ । ହେଲେ ଆଗାମୀ ବୈଠକ କେବେ ଓ କେଉଁଠି ବସିବ ତାହା ସ୍ପଷ୍ଟ ହୋଇନାହିଁ ।
ଷଷ୍ଠ କମାଣ୍ଡରସ୍ତରୀୟ ବୈଠକରେ ଏଲଏସିରେ ଭାରତ ଦଖଲ କରିଥିବା ବିଭିନ୍ନ ଅଞ୍ଚଳକୁ ଖାଲି କରିବାକୁ କହିଛି ଚୀନ । ଅଗଷ୍ଟ 29 ପରଠୁ ଭାରତୀୟ ସେନା ପାଙ୍ଗୋଙ୍ଗ୍ରେ ଦଖଲ କରିଥିବା ଅଞ୍ଚଳ ଗୁଡିକୁ ଖାଲି କରନ୍ତୁ ବୋଲି ଚୀନ ପକ୍ଷରୁ କୁହାଯାଇଛି । ଅନ୍ୟପକ୍ଷେ ଭାରତ ମଧ୍ୟ ଚୀନର ନାଲିଆଖିକୁ ନ ଡରି ଏହା ଉପରେ ନିଜ ପ୍ରତିକ୍ରିୟା ରଖିଛି । ପ୍ରତିଉତ୍ତରରେ ଭାରତ କହିଛି ଯେ ଏପ୍ରିଲ ପରଠୁ ପୂର୍ବ ଲଦାଖରେ ସୀମାରେ ଥିବା ଚୀନ ସୈନିକଙ୍କୁ ପଛକୁ ଘୁଞ୍ଚିବାକୁ କଡା ଚେତାବନୀ ଦେଇଛି ଭାରତ ।
