କୋଲକାତା: ଅଭିଜିତ ସାରା ଦୁନିଆର ଗରିବ ଲୋକଙ୍କ ପାଇଁ ପାଇଛି ନୋବେଲ । ଉଭୟ ପତି (ଅଭିଜିତ ବାନାର୍ଜୀ) ଓ ପତ୍ନୀ (ଇସ୍ଥର ଡ଼ୁଫ୍ଲୋ)ଙ୍କୁ ଏକା ସାଙ୍ଗରେ ନୋବେଲ ମିଳିବା ପରିବାର ପାଇଁ ଏହା ଠାରୁ ଆଉ ବଡ଼ ଖୁସି କିଛି ନାହିଁ । ଅର୍ଥନୀତିରେ ନୋବେଲ ପାଇଁ ମନୋନୀତ ହୋଇଥିବା ଅଭିଜିତ ବାନାର୍ଜୀଙ୍କ ମା ନିର୍ମଳା ବାନାର୍ଜୀ ‘ଇଟିଭି ଭାରତ’କୁ ପ୍ରତିକ୍ରିୟା ଦେଇ ଏପରି କହିଛନ୍ତି ।
ଅଭିଜିତଙ୍କ ପିତା- ମାତା ଉଭୟ ଅର୍ଥନୀତିରେ ପ୍ରଫେସର ମଧ୍ୟ ରହିଥିଲେ । ମାତା ନିର୍ମଳା କହିଛନ୍ତି, ‘ମୋ ପୁଅ ଓ ବୋହୂ ନୋବେଲ ପାଇବା ମୋ ପାଇଁ ବହୁତ ବଡ଼ ଆନନ୍ଦ । ମୁଁ ବହୁତ ଖୁସି । ଅଭିଜିତ ଛୋଟବେଳୁ ହିଁ ପାଠ ପଢିବା ପ୍ରତି ଆଗ୍ରହ ରଖିଥିଲା । ଏହା ସହିତ ଖେଳିବା, ବୁଲିବା, ଖାଦ୍ୟ ପ୍ରସ୍ତୁତ କରିବା ତାହାର ଗୋଟିଏ ସଉକ’ ବୋଲି କହିଛନ୍ତି ମା ନିର୍ମଳା ।
ବୋହୂ ଇସ୍ଥର ଡ଼ୁଫ୍ଲୋଙ୍କୁ ମଧ୍ୟ ସେ ଖୁବ୍ ପ୍ରଶଂସା କରିଛନ୍ତି । ସେ ବହୁତ ସ୍ମାର୍ଟ ଝିଅ, ସେ ନୋବେଲ ପାଇବ ବୋଲି ବିଶ୍ବସ ରହିଥିଲା ବୋଲି କହିଛନ୍ତି ଶାଶୁ ନିର୍ମଳା ବାନାର୍ଜୀ । ପଶ୍ଚିମବଙ୍ଗରେ ଜନ୍ମିତ ଅଭିଜିତ ପ୍ରଥମ ନୋବେଲ ବିଜେତା ହୋଇଥିବା ବେଳେ ଏହା ପୂର୍ବରୁ ଅମର୍ତ୍ୟ ସେନ ଭାରତୀୟ ବଂଶୋଦ୍ଭବ ଭାବେ ମଧ୍ୟ ଅର୍ଥନୀତିରେ ହାସଲ କରିଛନ୍ତି ନୋବେଲ ।
