ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡାକ୍ତର ହର୍ଷବର୍ଦ୍ଧନଙ୍କ ଅଧ୍ୟକ୍ଷତାରେ ଅନୁଷ୍ଠିତ ମନ୍ତ୍ରୀ ଦଳର ବୈଠକରେ କୋରୋନା ରୋକିବା ପାଇଁ ଦେଶରେ କରାଯାଉଥିବା ପ୍ରୟାସର ସମୀକ୍ଷା କରାଯାଇଛି । ମନ୍ତ୍ରୀ ଦଳର ବୈଠକରେ ନିଷ୍ପତ୍ତି ନିଆଯାଇଛି ଯେ ଯଦି ରେଡ ଜୋନର 170ଟି ଜିଲ୍ଲାରେ 14 ଦିନ ମଧ୍ୟରେ କୌଣସି ନୂଆ ସଂକ୍ରମଣ ଚିହ୍ନଟ ନହୁଏ, ତେବେ ଏହାକୁ ଅରେଞ୍ଜ ଜୋନରେ ପରିଣତ କରାଯିବ ।
ଆହୁରି ମଧ୍ୟ, ଯଦି ଆଗାମୀ 14 ଦିନ ମଧ୍ୟରେ କୌଣସି ମାମଲା ଆସେ, ତେବେ ଏହାକୁ ଗ୍ରୀନ ଜୋନ ଜିଲ୍ଲାଗୁଡ଼ିକରେ ରଖାଯିବ । ଦେଶରେ ରେଡ ଜୋନରେ 170ଟି ଜିଲ୍ଲା ରହିଛି । ଏଥିମଧ୍ୟରୁ 123 ଟି ଜିଲ୍ଲାରେ କୋରୋନା ଦ୍ବାରା ବେଶି ପ୍ରଭାବିତ ହୋଇଥିବାବେଳେ 47 ଟି ଜିଲ୍ଲାରେ କ୍ଲଷ୍ଟର ବିସ୍ତାର ହୋଇଛି । ସରକାର ସେମାନଙ୍କୁ ରେଡ୍ ଜୋନରେ ରଖିଛନ୍ତି ଏବଂ ସଂକ୍ରମିତ ଅଞ୍ଚଳକୁ ଏଠାରେ ସିଲ କରାଯାଇଛି । ସେହିପରି 207ଟି ଜିଲ୍ଲା ଅରେଞ୍ଜ ଜୋନରେ ଥିବାବେଳେ ସଂକ୍ରମଣ ସଂଖ୍ୟା ସୀମିତ ରହିଛି । ଏହା ବ୍ୟତୀତ 353ଟି ଜିଲ୍ଲା ଗ୍ରୀନ ଜୋନରେ ରହିଛି। ଏହି ଜିଲ୍ଲାଗୁଡ଼ିକରେ କୋରୋନା ସଂକ୍ରମଣର ଗୋଟିଏ ବି ମାମଲା ନାହିଁ।
ଏହି ବୈଠକରେ ସ୍ୱାସ୍ଥ୍ୟମନ୍ତ୍ରୀ ଡାକ୍ତର ହର୍ଷ ବର୍ଦ୍ଧନ ଅଧିକାରୀମାନଙ୍କୁ କହିଛନ୍ତିଯେ କୋରୋନା ଜୀବାଣୁ ବିରୋଧରେ ଲଢେଇରେ ପିପିଏର ଗୁଣବତ୍ତା ସହ କୌଣସି ଆପୋଷ ବୁଝାମଣା ହେବ ନାହିଁ । ସ୍ୱାସ୍ଥ୍ୟ କର୍ମୀଙ୍କ ପାଇଁ ଉଚ୍ଚମାନର ଚିକିତ୍ସା ସୁରକ୍ଷା ଉପକରଣର ଉପଲବ୍ଧତା ତୁରନ୍ତ କରାଯିବା ଉଚିତ ବୋଲି ସେ କହିଛନ୍ତି । ପିପିଇର ଉତ୍ପାଦନ ବୃଦ୍ଧି ଉପରେ ମଧ୍ୟ ଆଲୋଚନା କରାଯାଇଥିଲା । ଏହି ବୈଠକରେ ବୈଦେଶିକ ବ୍ୟାପାର, ନଗର ଉନ୍ନୟନ, ଗୃହ, ରାସାୟନିକ ପଦାର୍ଥ ଏବଂ ସାର ମନ୍ତ୍ରୀ ତଥା ବିଭିନ୍ନ ବିଭାଗର ଅଧିକାରୀମାନେ ଯୋଗ ଦେଇଥିଲେ।
ଦେଶରେ ମୃତ୍ୟୁହାର 3% ଏବଂ ପୁନରୁଦ୍ଧାର ହାର 12%
କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରୀ ଡକ୍ଟର ହର୍ଷବର୍ଦ୍ଧନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ବୈଠକରେ କୁହାଯାଇଛି ଯେ, ଦେଶରେ କୋରୋନା ମହାମାରୀରେ ମୃତ୍ୟୁ ହାର 3 ପ୍ରତିଶତ ଏବଂ ପୁନରୁଦ୍ଧାର ହାର 12 ପ୍ରତିଶତରୁ ଅଧିକ ଏବଂ ଅନ୍ୟ ଦେଶ ତୁଳନାରେ ଦେଶରେ ନିୟନ୍ତ୍ରଣରେ ରହିଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ, ଏହି ସମୟ ମଧ୍ୟରେ ଲୋକଙ୍କ ସୁସ୍ଥ ହେବାର ପ୍ରତିଶତ ମଧ୍ୟ ବୃଦ୍ଧି ପାଉଛି । ଶୁକ୍ରବାର ସନ୍ଧ୍ୟା ସୁଦ୍ଧା 1767 ଜଣ ଲୋକ ସୁସ୍ଥ ହୋଇଛନ୍ତି । ବର୍ତ୍ତମାନ କୋରୋନା ମହାମାରୀରେ ସଂକ୍ରମିତ ପ୍ରାୟ 11616 ରୋଗୀ ଦେଶର ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଛନ୍ତି ।
