ହାଇଦ୍ରାବାଦ: ଆଉ କିଛି ଘଣ୍ଟାର ଅପେକ୍ଷା ପରେ ଭାରତରେ ପହଞ୍ଚିବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ତାଙ୍କ ପରିବାର । ନିଜର ଏହି ଭାରତ ଯାତ୍ରାକୁ ନେଇ ବେଶ ଉତ୍ସାହିତ ରହିଛନ୍ତି ଟ୍ରମ୍ପ ପରିବାର । ଭାରତ ଗସ୍ତ ପୂର୍ବରୁ ଟ୍ରମ୍ପଙ୍କ ଝିଅ ଇଭାଙ୍କା ଟ୍ବିଟ କରି ମୋଦିଙ୍କ ସହ ନିଜ ଫଟୋ ସେୟାର କରିଛନ୍ତି ।
ଇଭାଙ୍କା ନିଜ ଟ୍ବିଟରେ ଲେଖିଛନ୍ତି ଯେ ଦୁଇ ବର୍ଷ ପୂର୍ବରୁ ନରେନ୍ଦ୍ର ମୋଦିଙ୍କ ସହ ହାଇଦ୍ରାବାଦରେ ଆୟୋଜିତ ଗ୍ଲୋବାଲ ଏଣ୍ଟ୍ରେପ୍ରେନ୍ୟୁରସିପ ଶିଖର ବୈଠକରେ ଯୋଗଦେବା ପରେ ଏବେ ପୁଣି ଥରେ ରାଷ୍ଟ୍ରପତି ଟ୍ରମ୍ପ ଓ ଆମେରିକାର ପ୍ରଥମ ମହିଳା ମେଲାନିଆଙ୍କ ସହ ଭାରତ ଫେରିବାକୁ ମୁଁ ଉତ୍ସାହିତ ରହିଛି । ଅଷ୍ଟମ ଗ୍ଲୋବାଲ ଏଣ୍ଟ୍ରେପ୍ରେନ୍ୟୁରସିପ ଶିଖର ବୈଠକରେ ଆମେରିକା ପ୍ରତିନିଧିମଣ୍ଡଳର ନେତୃତ୍ବ ନେଇଥିଲେ ଇଭାଙ୍କା ଟ୍ରମ୍ପ।
ତେବେ କିଛି ସମୟ ପୂର୍ବରୁ ରବିବାର ଭାରତ ଯାତ୍ରା ପାଇଁ ସ୍ବତନ୍ତ୍ର ବିମାନ ଏୟାରଫୋର୍ସ ଓ୍ବାନ ଯୋଗେଁ ଉଡାଣ ଭରିଛନ୍ତି ଟ୍ରମ୍ପ ପରିବାର । ସୋମବାର ଦିନ 11.40ରେ ଏହି ଫ୍ଲାଇଟ ଅହମଦାବାଦ ବିମାନ ବନ୍ଦରରେ ଅବତରଣ କରିବ ।
