ନୂଆଦିଲ୍ଲୀ: କେନ୍ଦ୍ରଗୃହ ମନ୍ତ୍ରଣାଳୟ ଆଜି ( ବୁଧବାର) ଜାମ୍ମୁ କାଶ୍ମୀରକୁ ନେଇ ବଡ ନିଷ୍ପତି ନେଇଛି । ନିଷ୍ପତି ଅନୁସାରେ ଜମ୍ମୁ କାଶ୍ମୀରରେ ମୁତୟନ ଥିବା କେନ୍ଦ୍ରୀୟ ସୁରକ୍ଷା ବଳଙ୍କ ମଧ୍ୟରୁ 100 କମ୍ପାନୀଙ୍କୁ ତୁରନ୍ତ ଫେରାଇ ଆଣିବ । ଯେଉଁଥିରେ ସିଆରପିଏଫର 40 ବିଏସଏଫର 20 ଏସଏସବିର 20 ଓ ସିଆଇଏସଏଫର 20 କମ୍ପାନୀ ଅଛନ୍ତି ।
କେନ୍ଦ୍ରଗୃହ ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି କେନ୍ଦ୍ର ଶାସିତ ରାଜ୍ୟ ଜମ୍ମୁ କାଶ୍ମୀରରୁ 100 କମ୍ପାନୀ ସାମରିକ ବଳଙ୍କୁ ପ୍ରତ୍ୟାହାର କରିବା ପାଇଁ କେନ୍ଦ୍ରୀୟ ଆର୍ମ ପୋଲିସ ଫୋର୍ସର ସମୀକ୍ଷା ପରେ ନିଷ୍ପତି ହୋଇଛି ।
ପ୍ରତ୍ଯାହାର ହେବାକୁ ଥିବା ସମସ୍ତ ଯବାନଙ୍କୁ ସେମାନଙ୍କ ଅବସ୍ଥାପିତ ରାଜ୍ୟକୁ ପଠାଇ ଦିଆଯିବ । ଗତବର୍ଷ ଅଗଷ୍ଟ 5 ରେ ଜମ୍ମୁ କାଶ୍ମୀରରୁ ଧାରା 370 ଉଚ୍ଛେଦ ପୂର୍ବରୁ କେନ୍ଦ୍ର ସରକାର ଆଇନ ଶୃଙ୍ଖଳା ବଜାୟ ରଖିବା ପାଇଁ ବିପୁଳ ପରିମାଣର ସୁରକ୍ଷା ବଳ ନିୟୋଜିତ କରିଥିଲେ ।
ଗୃହମନ୍ତ୍ରଣାଳୟ ତରଫରୁ ଜାରି ହୋଇଥିବା ନିର୍ଦ୍ଦେଶାବଳୀ ଅନୁସାରେ ଚଳିତ ସପ୍ତାହରେ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ ବା (ସିଆରପିଏଫ)ର 40 କମ୍ପାନି, କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଫ) ସୀମା ସୁରକ୍ଷା ବଳ ( ବିଏସଏଫ) ଓ ସଶସ୍ତ୍ର ସୀମା ସୁରକ୍ଷା ବଳ ( ଏସଏସବି) ର 20 କମ୍ପାନୀ ଲେଖାଏଁ ଯବାନଙ୍କୁ ପ୍ରତ୍ୟାହାର କରାଯିବ ।
ସୂଚନାଯୋଗ୍ୟଯେ ଏହା ପୂର୍ବରୁ ମଧ୍ୟ କମ୍ପାନୀ ଯବାନଙ୍କୁ ପ୍ରତ୍ୟାହର କରାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
