ନୂଆଦିଲ୍ଲୀ: ଜମ୍ମୁ କାଶ୍ମୀରରୁ ଧାରା 370 ଉଚ୍ଛେଦ ପରେ ପଡ଼ୋଶୀ ରାଷ୍ଟ୍ର ପାକିସ୍ତାନ ବିଳିବିଳାଉଛି । ଏପରିକି ଭାରତ ସହିତ ଯୁଦ୍ଧ କରିବାକୁ ଧମକ ଦେଇଛି । ତେବେ ଏହି ସମୟ ମଧ୍ୟରେ ଗୁଜୁରାଟର କଚ୍ଛ ଅଞ୍ଚଳ ଦେଇ ପାକିସ୍ତାନର କମାଣ୍ଡୋ ମାନେ ପ୍ରବେଶ କରିବେ ବୋଲି ସୂଚନା ମିଳିଛି ।
ଇଣ୍ଟେଲିଜେନ୍ସି ଏଜେନ୍ସି ଏନେଇ ଗୁରୁବାର ଚେତାବନୀ ଜାରି କରିଛି । ଏନେଇ ଉକ୍ତ ସଂସ୍ଥା କହିଛି ଯେ ପାକିସ୍ତାନର କିଛି ଅଣ୍ଡର ଓ୍ବାଟର କାମ୍ବେଟ(ପାଣି ମଧ୍ୟରେ ଯୁଦ୍ଧ)ରେ ପ୍ରଶିକ୍ଷିତ କମାଣ୍ଡୋ ମାନେ ଗୁଜୁରାଟର କଚ୍ଛ ଅଞ୍ଚଳ ଦେଇ ପ୍ରବେଶ କରିବାର ସମ୍ଭାବନା ରହିଛି । ଏହି ସୂଚନା ପାଇବା ପରେ ସୀମା ସୁରକ୍ଷା ବଳ ଏବଂ ଭାରତୀୟ ତଟ ରକ୍ଷକ ବଳ ସହିତ ଅନ୍ୟାନ୍ୟ ସୁରକ୍ଷା ବଳ ଗୁଡ଼ିକ ମଧ୍ୟ ହାଇ ଆର୍ଲଟରେ ରହିଥିବା ସୂଚନା ମିଳିଛି ।
ସେପଟେ କଚ୍ଛ ଉପକୂଳରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି । ଇଣ୍ଟେଲିଜେନ୍ସ ବ୍ୟୁରୋ(ଆଇବି) ଅନୁଯାୟୀ ପାକିସ୍ତାନର କିଛି ଏସଏସଜି କମାଣ୍ଡୋ କିମ୍ବା ଆତଙ୍କବାଦୀମାନେ ଭାରତ ମଧ୍ୟକୁ ପ୍ରବେଶ କରିବାକୁ ଯୋଜନା କରୁଥିବା ସୂଚନା ରହିଛି । ଏମାନେ ଛୋଟ ଡଙ୍ଗା ମାଧ୍ୟମରେ ଭାରତରେ ପ୍ରବେଶ କରିପାରନ୍ତି ବୋଲି ଆଇବି ପକ୍ଷରୁ ସୂଚନା ରହିଛି ।
ତେବେ ଏହି ସୂଚନା ପରେ ଗୁଜରାଟର କଣ୍ଡଲା ବନ୍ଦରଗାହରେ ମଧ୍ୟ ସୂଚନା ବଢାଇ ଦିଆଯାଇଛି । ଦେଶରେ ପରିସ୍ଥିତିକୁ ବିଗାଡ଼ିବା କିମ୍ବା ଗୁଜୁରାଟରେ ଆତଙ୍କବାଦୀଙ୍କ ଆକ୍ରମଣ ପାଇଁ ଆତଙ୍କବାଦୀମାନେ ମଧ୍ୟ ପ୍ରବେଶ କରିପାରନ୍ତି ବୋଲି ଜଣାପଡ଼ିଛି ।
