ବିଶାଖାପଟନମ: ଦେଶରେ କୋରୋନା କୋପ ଦିନକୁ ଦିନ ବଢୁଛି । ଏହାର ପ୍ରଭାବରେ କୋରୋନା ଆକ୍ରାନ୍ତଙ୍କୁ ଚିକିତ୍ସା କରୁଥିବା ଶହ ଶହ ଡାକ୍ତର ଓ ସ୍ବାସ୍ଥ୍ୟକର୍ମୀ ମଧ୍ୟ ଏବେ ବିପଦ ଘେରରେ । 24 ଘଣ୍ଟା ଏହି ଆକ୍ରାନ୍ତଙ୍କ ଚିକିତ୍ସା ସହ ଏମାନଙ୍କ ପାଖରେ ରହୁଥିବାରୁ ଏମାନଙ୍କ ପ୍ରତି ସଂକ୍ରମଣ ହେବାର ରହିଛି ଅଧିକ ସମ୍ଭାବନା । ତେବେ ଏହି ସମସ୍ୟାର ସମାଧାନ ସ୍ବରୂପ ଭାରତୀୟ ନୌସେନା ଖୋଜି ବାହାର କରିଛି ଏକ ନୂଆ ଟେକ୍ନୋଲୋଜି ।
ଆନ୍ଧ୍ରପ୍ରଦେଶ ବିଶାଖାପାଟନମସ୍ଥିତ ବିଶାଖା ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନ୍ସେସ(ଭିମ୍ସ)ରେ ଆଖାପାଖ ଜିଲ୍ଲାର କୋରୋନା ଆକ୍ରାନ୍ତଙ୍କ ଚିକିତ୍ସା କରାଯାଉଛି । ତେବେ ଚିକିତ୍ସା ସମୟରେ ଆଇସିୟୁ ମଧ୍ୟରେ ଥିବା ଆକ୍ରାନ୍ତଙ୍କ ଉପରେ ନଜର ରଖିଥିବା ସ୍ବାସ୍ଥ୍ୟକର୍ମୀ ଓ ଡାକ୍ତରଙ୍କ ପାଇଁ ଅତି ବିପଦପୂର୍ଣ୍ଣ । ଏହାର ସମାଧାନ ପାଇଁ ଭିମ୍ସ ନିର୍ଦ୍ଦେଶକ ଏକ କାର୍ଯ୍ୟକ୍ରମରେ ଅନୁରୋଧ କରିଥିଲେ । ଏହାର ପ୍ରତିକ୍ରିୟା ସ୍ବରୂପ ଭାରତୀୟ ନୌସେନା ଭିମ୍ସକୁ କିଛି ମଲ୍ଟି ଫିଡ ଅକ୍ସିଜେନ ମ୍ୟାନିଫୋଲ୍ଡ ହସ୍ତାନ୍ତର କରିଥିଲା । ତେବେ ଭିମ୍ସ ନିର୍ଦ୍ଦେଶକଙ୍କ ଅନୁରୋଧ କ୍ରମେ ରୋଗୀଙ୍କ ଉପରେ ନଜର ରଖିବା ପାଇଁ ମଧ୍ୟ ନୌସେନା ଖୋଜି ବାହାର କରିଛି ନୂଆ ଉପାୟ ।
ପୂର୍ବାଞ୍ଚଳ ନାଭାଲ କମାଣ୍ଡ ଅଧିନସ୍ଥ ବିଶାଖାପାଟନମର କେୟାର ଟିମରେ ଦୁଇ ଜଣ ଅଫିସର ଓ 4 ଜଣ ନାଭାଲ ଡକୟାର୍ଡର କର୍ମଚାରୀ ସାମିଲ ରହିଛନ୍ତି । ଛଅ ଦିନର ପରିଶ୍ରମ ପରେ ଏମାନେ ପ୍ରସ୍ତୁତ କରିଛନ୍ତି ଏକ ଅଡିଓ ଭିଜୁଆଲ ଆଉଟପୁଟ । ଏହା ଆକ୍ରାନ୍ତଙ୍କ ବେଡ ପାଖରେ ରଖାଯାଉଥିବା ମନିଟରିଂ ସିଷ୍ଟମର ଆଉଟପୁଟକୁ ଏଚଡିଏମଆଇ (HDMI)ରେ ପରିଣତ କରାଏ । ଅନ୍ୟ ଶବ୍ଦରେ କହିବାକୁ ଗଲେ ଏହି ଡିଜିଟାଲ ଭିଡିଓ ରେକର୍ଡର ଆକ୍ରାନ୍ତଙ୍କ ଗତିବିଧି ରେକର୍ଡ କରି ଆଇସିୟୁ ବାହାରେ ଥିବା ସ୍କ୍ରିନରେ ଦେଖାଏ ।
ଏହି ଡିଭାଇସ ଦ୍ବାରା ଏକକାଳୀନ 48 ଆକ୍ରାନ୍ତଙ୍କ ଉପରେ ନଜର ରଖିହେବ । ଏହାର ରେକର୍ଡିଂକୁ ଡାକ୍ତର ଓ ସ୍ବାସ୍ଥ୍ୟକର୍ମୀମାନେ ଆବଶ୍ୟକ ମୁତାବକ ଜୁମ କରି ଦେଖିପାରିବେ । ଏଥିସହ ଆକ୍ରାନ୍ତଙ୍କ ଗତିବିଧିରେ କିଛି ବି ଅସାମାନ୍ୟ ପରିଲକ୍ଷିତ ହେଲେ ଏହି ଡିଭାଇସ ଏକ ଅଡିଓ ଆଲାର୍ମ ଦେଇଥାଏ । ଯାହା ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ ଚେତାଇଦିଏ । ଅନ୍ୟପଟେ ଏଚଡିଏମଆଇ ଏଥରନେଟ କନଭର୍ଟର ସାହାଯ୍ୟରେ ଡାକ୍ତରମାନେ ନିଜ ମୋବାଇଲ ଫୋନରେ ଆକ୍ରାନ୍ତଙ୍କ ଉପରେ ନଜର ରଖିପାରିବେ ।
@IANS
