ନୂଆଦିଲ୍ଲୀ: ବଢିବ ତମାଖୁ ସେବନର ବୟସ ସୀମା । ପୂର୍ବରୁ ଆଇନଗତ ଭାବେ ଥିବା ବୟସ ସୀମା 18ରୁ 21 ବର୍ଷ କରାଯିବ । ଏନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ନିକଟରେ ଅନୁଷ୍ଠିତ ଏକ ବୈଠକରେ ପ୍ରସ୍ତାବ ରଖିଛି ।
ଗ୍ଲୋବାଲ ଆଡଲ୍ଟ ଟବାକୋ ସର୍ଭେ ପକ୍ଷରୁ କୁହାଯାଇଛି, ସାଧାରଣତଃ କୈଶୋର ଅବସ୍ଥାରେ ଧୂମପାନ ଆରମ୍ଭ ହୋଇଥାଏ । ଏହି ବୟସର ପିଲାମାନେ ଚାପଗ୍ରସ୍ତ କିମ୍ବା ଆଜି କାଲିର ଫ୍ୟାଶନ ଯୋଗୁଁ ଧୂମ୍ରପାନ କରିଥାନ୍ତି । ଏହି ନୂତନ ନିୟମରେ ଅନୁସାରେ ଅବିଭାବକ ମଧ୍ୟ ଏହି ବୟସର ପିଲାଙ୍କୁ ତମାଖୁ ଜାତୀୟ କୌଣସି ନିଶା ଦ୍ରବ୍ୟ ପାଇଁ ଦୋକାନକୁ ପଠାଇପାରିବେ ନାହିଁ ।
ତମାଖୁ ନିୟନ୍ତ୍ରଣ ଆଇନରେ ରହିଥିବା ବ୍ୟବସ୍ଥାକୁ ଏବେ କଡାକଡି ଭାବେ ଲାଗୁ କରାଯିବ । ବର୍ତ୍ତମାନ ଏହି ଆଇନରେ ରହିଥିବା ବ୍ୟବସ୍ଥା ଅନୁଯାୟୀ, ସର୍ବସାଧାରଣ ସ୍ଥାନରେ ସିଗାରେଟ ଟାଣିବା, ଶିକ୍ଷାନୁଷ୍ଠାନର 100 ୟାର୍ଡ ପରିସୀମା ଭିତରେ ସିଗାରେଟ ବିକ୍ରି କରିବା ଏବଂ 18ବର୍ଷରୁ କମ ପିଲାଙ୍କୁ ତମାଖୁ ବିକ୍ରି କରିବା ଦଣ୍ଡନୀୟ ଅପରାଧ ।
ସର୍ଭେରୁ ଜଣାଯାଇଛି, ପୁରୁଷଙ୍କ ଭିତରୁ 19%, ମହିଳାଙ୍କ ମଧ୍ୟରୁ 2% ଏବଂ ସମସ୍ତ ସାବାଳକଙ୍କ ମଧ୍ୟରୁ 10.7% ତମାଖୁ ସେବନ କରୁଛନ୍ତି । ଅନ୍ୟପକ୍ଷରେ 29.6% ପୁରୁଷ, 12.8% ମହିଳା ଏବଂ 21.8% ସାବାଳକ ଧୂଆଁ ବିହୀନ ତମାଖୁ ବ୍ୟବହାର କରୁଛନ୍ତି ।
