ଚଣ୍ଡିଗଡ: ଚଳିତ ବର୍ଷ ହରିୟାଣାରେ ଅନୁଷ୍ଠିତ ହୋଇଥିବା ବିଧାନସଭା ନିର୍ବାଚନର ଫଳାଫଳ ପ୍ରକାଶ ପାଇସାରିଛି । ହେଲେ ରାଜ୍ୟରେ ନୂତନ ସରକାର ଗଠନ କରିବା ପାଇଁ କରିବା କୌଣସି ଦଳକୁ ଆବଶ୍ୟକୀୟ ବହୁମତ ମିଳିନାହିଁ । ହରିୟାଣାରେ କ୍ଷମତାସୀନ ଥିବା ମନୋହର ଲାଲ ଖଟ୍ଟରଙ୍କ ନେତୃତ୍ବରେ ବିଜେପି, ନଗଗଠିତ ଜନନାୟକ ଜନତା ପାର୍ଟି(ଜେଜେପି) ଏବଂ ସ୍ବାଧୀନ ବିଧାୟକଙ୍କ ସମର୍ଥନ ବଳରେ ଦ୍ବିତୀୟ ଥର ପାଇଁ ସରକାର ଗଠନ କରିଛି ।
ହରିୟାଣାରେ ଦ୍ବିତୀୟ ଥର ପାଇଁ ମୁଖ୍ୟମନ୍ତ୍ରୀ ଭାବେ ମନୋହର ଲାଲ ଖଟ୍ଟର ଓ ଉପମୁଖ୍ୟମନ୍ତ୍ରୀ ଦୁଷ୍ୟନ୍ତ ଚୌଟାଲା ଶପଥ ଗ୍ରହଣ କରି ସାରିଛନ୍ତି । ଏହା ମଧ୍ୟରେ ଏକ ସପ୍ତାହ ବିତି ଯାଇଥିଲେ ମଧ୍ୟ ନୂତନ ମନ୍ତ୍ରୀମଣ୍ଡଳ ଗଠନ ନେଇ ସହମତି ହୋଇପାରୁନାହିଁ । ଗତ ଅକ୍ଟୋବର 27ରେ ଶପଥ ଗ୍ରହଣ ସାରିବା ପରେ ବିଧାନସଭାର ବିଶେଷ ଅଧିବେଶନ ପରେ ମନ୍ତ୍ରୀମଣ୍ଡଳ ଗଠନ କରାଯିବ ବୋଲି କହିଥିଲେ ମୁଖ୍ୟମନ୍ତ୍ରୀ ମନୋହର ଲାଲ । ଏହି ଅଧିବେଶନ ଚଳିତ ନଭେମ୍ବର 4ରୁ ଆରମ୍ଭ ହୋଇ 6ରେ ଶେଷ ହୋଇଛି । ଏହାର ପ୍ରଥମ ଦିନରେ ସମସ୍ତ ନବ ନିର୍ବାଚିତ ବିଧାୟକ ଶପଥ ଗ୍ରହଣ କରିଥିଲେ ।
ସରକାର ସାମିଲ ହେବା ପରେ, ବିଜେପିର ମେଣ୍ଟ ସହଯୋଗୀ ତଥା ନଗଗଠିତ ରାଜନୈତିକ ଦଳ ଜେଜେପି ନେତା ଦୁଷ୍ୟନ୍ତ ଚୌଟାଲା କହିଛନ୍ତି ଯେ, ବିଜେପିକୁ ତାଙ୍କ ଦଳର ଆଭ୍ୟନ୍ତରୀଣ ମାମଲାରେ ହସ୍ତକ୍ଷେପ କରିବା ପାଇଁ ଅନୁମତି ଦିଆଯିବ ନାହିଁ । ଆମ ଦଳରୁ କିଏ ମନ୍ତ୍ରୀ ହେବ ତାହା ଆମେ ନିର୍ଣ୍ଣୟ କରିବୁ । ମନ୍ତ୍ରୀମଣ୍ଡଳରେ ସାମିଲ କରିବା ପାଇଁ ଦୁଇ ଦଳ ନିଜ ନିଜର ବିଧାୟକ ଚୟନ କରିବେ। ଖବର ଅନୁସାରେ ସାତ ନିର୍ଦଳୀୟ ବିଧାୟକ ବିଜେପିକୁ ବିନା ସର୍ତ୍ତରେ ସମର୍ଥନ କରିଛନ୍ତି । ସେମାନଙ୍କୁ ରାଜ୍ୟମନ୍ତ୍ରୀ ପାହ୍ୟ ମିଳିବ ବୋଲି ଆଶାବାଦୀ ଅଛନ୍ତି । 2019 ହରିୟାଣା ବିଧାନସଭାକୁ ନିର୍ବାଚିତ ହୋଇଥିବା 7 ନିର୍ଦଳୀୟ ବିଧାୟକଙ୍କ ମଧ୍ୟରୁ 6 ଜଣ ବିଜେପିର ବିଦ୍ରୋହୀ ବିଧାୟକ ।
ମୋଟ 90 ଆସନ ବିଶିଷ୍ଟ ହରିଆନା ବିଧାନସଭା ନିର୍ବାଚନରେ ବିଜେପି ସବୁଠୁ ବଡ ଦଳ ଭାବେ ଉଭା ହୋଇଥିଲା । ଏହି ନିର୍ବାଚନରେ ବିଜେପିକୁ 40, କଂଗ୍ରେସକୁ 31, ଜେଜେପିକୁ 10, ଆଇଏଲଏଲଡିକୁ 1, ଲୋକହିତ ପାର୍ଟିକୁ 1ଟି ଆସନ ମିଳିଛି । ସେହପରି 7ଟି ଆସନରେ ସ୍ବାଧୀନ ପ୍ରାର୍ଥୀ ବାଜିମାତ କରିଛନ୍ତି।
