ଥିରୁଅନନ୍ତପୁରମ: ଅନିଚ୍ଛା ସତ୍ତ୍ୱେ ନାଗରିକତା ସଂଶୋଧନ ଆଇନ୍(ସିଏଏ) ବିରୋଧୀ ପ୍ରସ୍ତାବ ପାଠ କରିଛନ୍ତି ରାଜ୍ୟପାଳ ଆରିଫ ମହମ୍ମଦ ଖାନ। ପ୍ରଥମେ ସେ ଏହି ପ୍ରସ୍ତାବ ପାଠ କରିବାକୁ ମନା କରିଥିଲେ। ହେଲେ ମୁଖ୍ୟମନ୍ତ୍ରୀ ପିନରାୟୀ ବିଜୟନଙ୍କ ଅନୁରୋଧ କ୍ରମେ ସେ ଏହି ପ୍ରସ୍ତାବ ପାଠ କରିଥିଲେ। ପ୍ରାସ୍ତାବ ପାଠ ପୂର୍ବରୁ ସେ ବାରମ୍ବାର ନିଜ ଅସହମତି ପ୍ରକାଶ କରିଥିଲେ।
ଏହି ସମୟରେ ରାଜ୍ୟପାଳ କହିଛନ୍ତି, 'ମୁଁ ସିଏଏ ବିରୋଧୀ ପ୍ରସ୍ତାବ ପାଠ କରିବାକୁ ଯାଉଛି । କାରଣ ମୁଖ୍ୟମନ୍ତ୍ରୀ ଏହା ଚାହୁଁଛନ୍ତି। ହେଲେ ମୋ ବିଚାରଧାରା ଅନୁଯାୟୀ ଏହା ନୀତି ଏବଂ କାର୍ଯ୍ୟକ୍ରମ ଅଧିନରେ ଆସୁନାହିଁ । ଏହା କେରଳ ସରକାରଙ୍କ ଇଚ୍ଛା। ତାଙ୍କ ଇଚ୍ଛାର ସମ୍ମାନ କରିବା ପାଇଁ ମୁଁ ଏହି ପ୍ରସ୍ତାବ ପାଠ କରୁଛି । '
ସିଏଏକୁ ନେଇ କେରଳ ସରକାର ଏବଂ ରାଜ୍ୟପାଳଙ୍କ ମଧ୍ୟରେ ବିବାଦ ଜାରି ରହିଛି। ସିଏଏ ବିରୋଧରେ କେରଳ ସରକାର ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ। ହେଲେ ସରକାର ତାଙ୍କର ଏହି ନିଷ୍ପତ୍ତି ବାବଦରେ ରାଜ୍ୟପାଳଙ୍କୁ ଅବଗତ କରାଇନଥିଲେ। ଯାହାକୁ ନେଇ ରାଜ୍ୟପାଳ ନିଜର ଆପତ୍ତି ଜଣାଇଛନ୍ତି। ଏହା ବ୍ୟତୀତ ରାଜ୍ୟପାଳ କେରଳ ବିଧାନସଭାରେ ପାରିତ ହୋଇଥିବା ସିଏଏ ବିରୋଧୀ ପ୍ରସ୍ତାବକୁ ଭୁଲ୍ ବୋଲି କହିଥିଲେ।
