ନୂଆଦିଲ୍ଲୀ:ବଜେଟ ଅଭିଭାଷଣ ବେଳେ କେନ୍ଦ୍ର ସରକାରଙ୍କ କୋଭିଡ ମୁକାବିଲା ପାଇଁ ପ୍ରଶଂସାରେ ଶତମୁଖ ରାଷ୍ଟ୍ରପତି କୋବିନ୍ଦ । ସରକାରଙ୍କ ଉଚିତ ପଦକ୍ଷେପ ପାଇଁ କୋରୋନା ସ୍ଥିତି ନିୟନ୍ତ୍ରଣ ରହିଛି। ଏହାସହ ଅନେକ ଜୀବନ ଭାଇରସ କବଳରୁ ବଞ୍ଚିଯାଇଛି । ମହାମାରୀ ସମୟରେ ବହୁ ଅସୁବିଧାର ସମ୍ମୁଖୀନ ହୋଇଥିବା ଲୋକଙ୍କ ସମସ୍ତ କ୍ଷେତ୍ରର ଉନ୍ନତ କରିବା ପାଇଁ ସରକାର ଅନେକ ଯୋଜନା ପ୍ରଣୟନ କରିଛନ୍ତି ବୋଲି ସଂସଦର ବଜେଟ୍ ଅଧିବେଶନକୁ ସମ୍ବୋଧିତ କରି ରାଷ୍ଟ୍ରପତି କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, "ମୁଁ ସନ୍ତୁଷ୍ଟ ଯେ କେନ୍ଦ୍ର ସରକାର ନେଇଥିବା ଠିକ ସମୟର ପଦକ୍ଷେପ ପାଇଁ ଲକ୍ଷ ଲକ୍ଷ ନାଗରିକଙ୍କ ଜୀବନ ରକ୍ଷା ହୋଇପାରିଛି । ଯେଉଁଥି ପାଇଁ ଆଜିକା ସମୟରେ ନୂତନ କୋରୋନା ମାମଲା ଦ୍ରୁତ ଗତିରେ ହ୍ରାସ ପାଉଛି ଓ ସୁସ୍ଥହାର ସଂଖ୍ୟା ଦ୍ରୁତଗତିରେ ବୃଦ୍ଧି ପାଇଛି।"
ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କୁ ଗୃହରେ ମନେ ପକାଇବା ସହ କୋଭିଡ ସଂକଟ ବେଳେ ଦେହାନ୍ତ ହୋଇଥିବା 6 ଜଣ ସାଂସଦଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । କୋରୋନା କାଳରେ ଏ ଅଧିବେଶନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ । ସବୁଠୁ ବଡ କଥା ହେଉଛି ଯେତେ ପରୀକ୍ଷା ଆସୁ ଭାରତ ଅଟକିନି କି ଅଟକିବନି ବୋଲି ରାଷ୍ଟ୍ରପତି ଦମ୍ଭୋକ୍ତି ପ୍ରକାଶ କରିଛନ୍ତି ।
ଦେଶର ସର୍ବ ବୃହତ ଟୀକାକରଣ କାର୍ଯ୍ୟକ୍ରମରେ ଲକ୍ଷ ଲକ୍ଷ ସ୍ବାସ୍ଥ୍ୟକର୍ମୀ ଏବଂ ଫ୍ରଣ୍ଟଲାଇନ କାର୍ଯ୍ୟକର୍ତ୍ତାଙ୍କୁ ଟିକା ଦେବାର ଲକ୍ଷ୍ୟ ରଖାଯାଇଛି। ତେବେ ଟୀକାକରଣର ପ୍ରଥମ ପର୍ଯ୍ୟାୟ ଶେଷ ସୁଦ୍ଧା ପାଖାପାଖି 3 କୋଟି ଲୋକଙ୍କୁ ଟିକା ଦିଆଯିବ।
