ନୂଆଦିଲ୍ଲୀ: 2019 ଲୋକସଭା ନିର୍ବାଚନର ଷଷ୍ଠ ପର୍ଯ୍ୟାୟରେ ଆଜି ମତଦାନ ଆରମ୍ଭ ହୋଇଯାଇଛି । 7ଟି ରାଜ୍ୟର 59 ଲୋକସଭା ଆସନ ପାଇଁ ମତଦାନ ଦେଉଛନ୍ତି ମତଦାତା । ଏହି ଅବସରରେ ସବୁଠୁ ବଡ଼ ସର୍ଚ୍ଚ ଇଞ୍ଜିନ ଗୁଗଲ ନିଜର ଡୁଡଲ ଜରିଆରେ ମତଦାନର ମହତ୍ତ୍ବକୁ ଦେଶବାସୀଙ୍କୁ ବୁଝେଇବାକୁ ଚେଷ୍ଟା କରିଛି । ଗୁଗଲ ଲେଖା ହୋଇଥିବା ଇଂରାଜୀ ଅକ୍ଷରରେ ମଝିରେ ଭୋଟ ଦେଉଥିବା ଅଙ୍ଗୁଳିରେ କାଳିର ଚିହ୍ନ ରହିଛି । ଯାହାକି ଭୋଟ ଦେବା ସଙ୍କେତ ।
ମତଦାନ ଚାଲିଥିବା ରାଜ୍ୟମାନଙ୍କ ମଧ୍ୟରୁ ଉତ୍ତରପ୍ରଦେଶରେ ସବୁଠୁ ଅଧିକ ଅର୍ଥାତ 14ଟି ଲୋକସଭା ଆସନ ସାମିଲ ରହିଛି । ତା ଛଡା ଆଜି ହରିୟାଣାରେ 10ଟି ଆସନ, ରାଜଧାନୀ ଦିଲ୍ଲୀରେ 7ଟି ଆସନ, ମଧ୍ୟପ୍ରଦେଶରେ 8ଟି, ପଶ୍ଚିମବଙ୍ଗରେ 8ଟି, ବିହାରରେ 8ଟି ଏବଂ ଝାଡ଼ଖଣ୍ଡରେ 4ଟି ଆସନ ପାଇଁ ମତଦାନ ଆରମ୍ଭ ହେଲାଣି । ଏହି ପର୍ଯ୍ୟାୟରେ ସପା (ସମାଜବାଦୀ ପାର୍ଟି)ର ମୁଖ୍ୟ ଅଖିଳେଶ ଯାଦବ, କେନ୍ଦ୍ରୀୟ ମନ୍ତ୍ରୀ ମେନକା ଗାନ୍ଧୀ, ରାଧାମୋହନ ସିଂହ, ହର୍ଷବର୍ଦ୍ଧନ, ଜ୍ୟୋତିରାଦିତ୍ୟ ସିନ୍ଧିଆଙ୍କ ଭଳି ଦିଗଜ ନେତା ଭାଗ୍ୟ ପରୀକ୍ଷା ଦେଉଛନ୍ତି ।
