ଜୟପୁର: ରାଜସ୍ଥାନର ଜୟପୁରସ୍ଥିତ ଚାରଦିବାରୀ ଅଞ୍ଚଳରେ ସୋମବାର ଏକ ଘରେ ବ୍ଲାଷ୍ଟ ହୋଇଥିଲା ସିଲିଣ୍ଡର ଟାଙ୍କି । ଘଟଣାରେ ଘରର ଛାତ ଭୁଷୁଡି ପଡିବା ସହ ଫସି ରହିଛନ୍ତି ପରିବାରର ସଦସ୍ୟ । ସେପଟେ ବର୍ତ୍ତମାନ ସୁଦ୍ଧା ଘଟଣାରେ 2 ଜଣଙ୍କର ମୃତ୍ୟୁ ହୋଇଥିବାବେଳେ ଜଣଙ୍କର ଅବସ୍ଥା ସଙ୍କଟାପନ୍ନ ରହିଥିବା ଜଣାପଡିଛି । ଆହତଙ୍କୁ ନିକଟସ୍ଥ ସବାଇ ମାନସିଂହ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।
ସିଲିଣ୍ଡର ବ୍ଲାଷ୍ଟ ହେବା ପରେ ଘରୁ ପରିବାର ଲୋକଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରିବାକୁ ପହଞ୍ଚିଥିଲେ । ଏହାପରେ ସ୍ଥାନୀୟ ଲୋକଙ୍କଠାରୁ ଖବର ପାଇ ଘଟଣାସ୍ଥଳରେ ପହଞ୍ଚିଥିଲେ ଡିସିପି(ନର୍ଥ) ରାଜୀବ ପଚାର, ଅତିରିକ୍ତ ଡିସିପି(ନର୍ଥ) ସୁମିତ ଗୁପ୍ତା, ଏସିପି ଅଶୋକ ଚୌହାନ ଓ ଅନ୍ୟ ପୋଲିସ କର୍ମଚାରୀ । ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଏଥିରେ ଅଧିକ ଲୋକ ଆହତ ହୋଇ ନଥିବା ଅନୁମାନ କରାଯାଉଛି ।
ତେବେ ସ୍ଥାନୀୟ ତାଡକେଶ୍ବର ମନ୍ଦିରର ଅତି ନିକଟରେ ଏହି ଦୁର୍ଘଟଣା ଘଟିଛି । ସେପଟେ ସୋମବାର ହୋଇଥିବାରୁ ମନ୍ଦିରରେ ଅନେକ ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଥିଲା । ଏହି ସମୟରେ ସମ୍ପୃକ୍ତ ଘରେ ଗ୍ୟାସ ପାଇପରେ ନିଆଁ ଲାଗିବାରୁ କିଛି ବିଚାର କରିବା ଆଗରୁ ସିଲିଣ୍ଡର ଫାଟିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
