ସୁରଟ: ଧରାପୃଷ୍ଠରେ ପୂଜିତ ହେଉଛନ୍ତି ମା' ମହିଷାମର୍ଦ୍ଦିନୀ । ନଅଦିନ ଧରି ପୂଜା ପାଇବେ ଦୁର୍ଗତି ନାଶିନୀ । କାଶ୍ମୀରରୁ କନ୍ୟା କୁମାରୀ ସବୁଠି ଚାଲିଛି ମା'ଙ୍କ ଆରାଧନା । ଏହି ସମୟରେ ଘଣ୍ଟ ଘଣ୍ଟାଦିରେ ପ୍ରକମ୍ପିତ ହେଉଛି ସବୁ ଶକ୍ତିପୀଠ । ସେପଟେ, ବିଭିନ୍ନ ଅନୁଷ୍ଠାନ ପକ୍ଷରୁ ଆରମ୍ଭ ହୋଇଯାଇଛି ଗରବା ନୃତ୍ୟ । ତେବେ ଚଳିତ ଥର ମୁଖ୍ୟ ଆକର୍ଷଣ ପାଲିଟିଥିଲା ଖିଲାଡି ଗରବା ଓ ନିଆଁରେ ଗର୍ବା ପରିବେଷଣ ।
ଗୁଜୁରାଟର ସୁରଟରେ 80 ଜଣ ଆଥଲେଟିକଙ୍କୁ ନେଇ ପରିବେଷଣ ହୋଇଥିଲା ଗରବା । ଯେଉଁଠି ସ୍କେଟିଂ ମାଧ୍ୟମରେ ନୃତ୍ୟ କରୁଥିଲେ ଛୋଟରୁ ବଡ ପିଲାମାନେ । କେବଳ ଗରବା ନୁହେଁ ଏଥିରେ ସାମିଲ ଥିଲା ମଡର୍ଣ୍ଣ ଡ୍ୟାନ୍ସ । ସାଧାରଣ ଗରବା ଅପେକ୍ଷା ସେକ୍ଟିଂରେ ଡ୍ୟାନ୍ସ ଅପେକ୍ଷାକୃତ କଷ୍ଟସାଧ୍ୟ । କିନ୍ତୁ ତଥାପି ପିଲାଙ୍କ ମଧ୍ୟରେ କିଛି ନୂଆ କରିବାର ଜୋଶ ସମସ୍ତଙ୍କ ମନରେ ଉତ୍ସାହ ଭରି ଦେଇଥିଲା ।
ଗୁଜୁରାଟର ଜାମନଗରରେ ନିଆଁରେ ଗରବା କରୁଥିବା ଦେଖିବାକୁ ମିଳିଥିଲା । ବାଜା ବାଣ ସାଙ୍ଗକୁ ଢୋଲ ନିଶାନରେ ଝୁମିଥିଲେ ସମସ୍ତେ । ତେବେ ପୂର୍ବରୁ ଗରବା ମାଧ୍ୟମରେ ଗୁଜୁରାଟରେ ଲୋକଙ୍କୁ ସଚେତନ କରାଯାଇଥିଲା । ନୂତନ ଟ୍ରାଫିକ ନିୟମ ଲାଗୁ ହେବା ପରେ ଲୋକଙ୍କୁ ସଚେତନା କରିବା ନେଇ ହେଲମେଟ ପିନ୍ଧି ଗରବା କରୁଥିବାର ଦୃଶ୍ୟ ଦେଖିବାକୁ ମିଳିଥିଲା ।
