ହାଇଦ୍ରାବାଦ: ମୋହନଦାସ କରମଚାନ୍ଦ ଗାନ୍ଧୀ ତଥା ଅହିଂସାର ଜନକ ବାପୁଜୀ । ନିଜ କାର୍ଯ୍ୟ ଓ ଲେଖା ମାଧ୍ୟମରେ ଯୁବପୀଢି ତଥା ସାଧାରଣ ନାଗରିକଙ୍କ ମଧ୍ୟରେ ଅହିଂସାକୁ ପ୍ରସାରିତ କରିଥିଲେ ସେ । ଅହିଂସା ହିଁ ହିଂସାକୁ ପରାଜିତ କରିପାରିବ ବୋଲି ସେ ଲୋକଙ୍କୁ ବୁଝାଉଥିଲେ ।
ଅହିଂସା ଉପାୟରେ ଅନୁପ୍ରାଣୀତ ହୋଇ ଅନେକ ଯୁବକ ସ୍ବାଧୀନତା ଆନ୍ଦୋଳନରେ ସାମିଲ ହୋଇଥିଲେ । ଆନ୍ଦୋଳନକୁ ଆହୁରି ତୀବ୍ର କରିବା ଲାଗି ଗାନ୍ଧୀଜୀ ବିଭିନ୍ନ ସ୍ଥାନରେ ସଭା ସମିତି କରି ଆନ୍ଦୋଳନରେ ଯୋଗଦେବାପାଇଁ ଲୋକଙ୍କୁ କହୁଥିଲେ । ଏଥିରେ ପ୍ରଭାବିତ ହୋଇ 1930 ମସିହାରେ ଉତ୍ତରପ୍ରଦେଶ ଝାନସୀର ବାସିନ୍ଦା ଦୁର୍ଗାପ୍ରସାଦ ଶର୍ମା ଗାନ୍ଧୀଜୀଙ୍କୁ ଚିଠି ଲେଖି ନିଜର ଇଚ୍ଛା ପ୍ରକଟ କରିଥିଲେ ।
ଦୁର୍ଗାପ୍ରସାଦଙ୍କ ଚିଠିର ପ୍ରତିଉତ୍ତର ଦେବାକୁ ଯାଇ ଗାନ୍ଧୀଜୀ ସେ ଅଞ୍ଚଳର ଅଧିକରୁ ଅଧିକ ଯୁବକଙ୍କୁ ଆନ୍ଦୋଳନରେ ସାମିଲ କରିବା ପାଇଁ ନିଜ ସେକ୍ରେଟାରୀ ମାଧ୍ୟମରେ ଚିଠି ଲେଖି ଜଣାଇଥିଲେ । ସେହି ଦିନଠାରୁ ଦୁର୍ଗାପ୍ରସାଦ ସ୍ବାଧୀନତା ଆନ୍ଦୋଳନ ପାଇଁ ନିଜକୁ ସମ୍ପୂର୍ଣ୍ଣ ରୂପେ ସମର୍ପିତ କରିଥିଲେ ।
ତେବେ ଗାନ୍ଧୀଜୀ ଦୁର୍ଗା ପ୍ରସାଦ ଶର୍ମାଙ୍କୁ ଲେଖିଥିବା ସେହି ଚିଠି ଆଜି ବି ତାଙ୍କ ବୋହୂ ମନୋରମା ଦେବୀଙ୍କ ପାଖରେ ରହିଛି । ଯାହାକୁ ଦେଖିବା ଲାଗି ଆଖପାଖର ଅନେକ ଲୋକଙ୍କ ଏଠାକୁ ଆସନ୍ତି ।
ମୁମ୍ବାଇ, ଦିଲ୍ଲୀ କିମ୍ବା ରାଜସ୍ଥାନକୁ ନ ଆସି ବୁନ୍ଦେଲଖଣ୍ଡରେ ରହି ଆନ୍ଦୋଳନକୁ ଆଗେଇ ନେବା ପାଇଁ ଦୁର୍ଗା ପ୍ରସାଦଙ୍କୁ ଗାନ୍ଧୀଜୀ ଦେଇଥିବା ଚିଠିରେ ଦର୍ଶାଇଥିଲେ । ଏହାସହ ସେଠାରେ ଏକ ମଜଭୁତ ଟିମ୍ ଗଠନ କରି ସ୍ବାଧୀନତା ଆନ୍ଦୋଳନକୁ ତୀବ୍ରତର କରିବାକୁ ସେ ଚିଠିରେ ଉଲ୍ଲେଖ କରିଥିଲେ ।
ଗାନ୍ଧୀଜୀ ଯେତେବେଳେ ଆନ୍ଦୋଳନ ପାଇଁ ଟଙ୍କା ଯୋଗାଡ କରିବାକୁ ଲୋକଙ୍କୁ କହୁଥିଲେ ସେହି ସମୟରେ ମନୋରମା ଦେବୀଙ୍କ ମା ଦେବକା ଦେବୀ ପାଠକ ନିଜ ଗହଣା ବିକି ଆନ୍ଦୋଳନ ପାଇଁ ଟଙ୍କା ଯୋଗାଡ କରିଥିଲେ । ଏଥିସହ ସେ ମଧ୍ୟ ଆନ୍ଦୋଳନରେ ନିଜକୁ ସାମିଲ କରିଥିଲେ ।
