ନୂଆଦିଲ୍ଲୀ: ପରଲୋକରେ ଭାରତର ପୂର୍ବତନ ମୁଖ୍ୟ ନିର୍ବାଚନ କମିଶନର ଟିଏନ ଶେଷନ। ରବିବାର ରାତିରେ ଚେନ୍ନାଇ ସ୍ଥିତ ବାସଭବନରେ ହୃଦଘାତରେ ଶେଷ ନିଶ୍ବାସ ତ୍ୟାଗ କରିଛନ୍ତି ସେ । ମୃତ୍ୟୁବେଳକୁ ତାଙ୍କୁ 86 ବର୍ଷ ହୋଇଥିଲା ।
ସେ 1990 ଡିସେମ୍ବର 12ରୁ 1996 ଡିସେମ୍ବର 11 ପର୍ଯ୍ୟନ୍ତ ଭାରତର ମୁଖ୍ୟ ନିର୍ବାଚନ କମିଶନର ରୂପେ ଦାୟିତ୍ବ ତୁଲାଇଥିଲେ । ତେବେ ମୁଖ୍ୟ ନିର୍ବାଚନ କମିଶନର ଦାୟିତ୍ବ ତୁଲାଇବା ପୂର୍ବରୁ 1989 ମସିହାରେ କ୍ୟାବିନେଟ ସଚିବ ଭାବେ ଦାୟିତ୍ବ ତୁଲାଇଥିଲେ । ସରକାରୀ ସେବା ପାଇଁ ତାଙ୍କୁ 1996 ମସିହାରେ ‘ରମଣ ମାଗାସେସେ’ ଆୱାର୍ଡରେ ସମ୍ମାନିତ କରାଯାଇଥିଲା ।
ତେବେ ଟିଏନ ଶେଷନଙ୍କ ମୃତ୍ୟୁରେ ସାରା ଦେଶରେ ଶୋକର ଛାୟା ଖେଳି ଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ବିଟ୍ କରି ତାଙ୍କୁ ଶ୍ରଦ୍ଧାଞ୍ଜଳୀ ଦେଇଛନ୍ତି । ମୋଦି ଟ୍ବିଟ କରି ଲେଖିଛନ୍ତି, ଶ୍ରୀ ଟିଏନ ଶେଷନ ଜଣେ ଉକୃଷ୍ଟ ଦକ୍ଷ ପ୍ରଶାସକ ଥିଲେ । ସେ ଅତ୍ୟନ୍ତ କଠୋର ନିଷ୍ଠା ଓ ପରିଶ୍ରମରେ ଦେଶର ସେବା କରିଛନ୍ତି । ତାଙ୍କର ପ୍ରୟାସ ଯୋଗୁଁ ଗଣତନ୍ତ୍ର ସୁଦୃଢ ହୋଇପାରିଛି ।
