ନୂଆଦିଲ୍ଲୀ: ରାଫେଲ ଚୁକ୍ତିକୁ ନେଇ ଉଠୁଥିବା ବିବାଦ ଉପରେ ଆପତ୍ତି ପ୍ରକାଶ କରିଛନ୍ତି ପୂର୍ବତନ ବାୟୁସେନା ପ୍ରମୁଖ ବିଏସ ଧନୱା । ଏଭଳି ବିବାଦ ପ୍ରତିରକ୍ଷା ଚୁକ୍ତିକୁ ମନ୍ଥର କରିଦିଏ । ଏହାଦ୍ବାରା ସଶସ୍ତ୍ର ବାହିନୀର କ୍ଷମତା ଉପରେ ପ୍ରଭାବ ପଡିଥାଏ ବୋଲି ସେ କହିଛନ୍ତି । ଏହା ସହିତ ପ୍ରତିରକ୍ଷା ଚୁକ୍ତିରେ ହେଉଥିବା ମନ୍ଥର ଗତି ଉପରେ କ୍ରୋଧ ପ୍ରକାଶ କରି ସେ କହିଛନ୍ତି, ଭାରତ-ପାକିସ୍ତାନ ଗତିରୋଧ ସମୟରେ ଯଦି ୱିଙ୍ଗ କମାଣ୍ଡର ଅଭିନନ୍ଦନ ବର୍ଦ୍ଧମାନଙ୍କ ନିକଟରେ ମିଗ-୨୧ ସ୍ଥାନରେ ରାଫେଲ ଥାଆନ୍ତା, ତା’ହେଲେ ଆଜି ଫଳାଫଳ ଆଉ କିଛି ହୋଇଥାନ୍ତା ବୋଲି ଧନୱା କହିଛନ୍ତି ।
ଆଇଆଇଟି ବମ୍ବେର ଏକ କାର୍ଯ୍ୟକ୍ରମରେ ଯୋଗ ଦେଇ ଧନୱା କହିଛନ୍ତି, ସୁପ୍ରିମକୋର୍ଟ ଏହି ପ୍ରସଙ୍ଗରେ ଉକୃଷ୍ଟ ନିଷ୍ପତ୍ତି ନେଇଛନ୍ତି । ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କ୍ଲିନ ଚିଟ ଦେଇ ଠିକ କରିଛନ୍ତି । ମୁଁ ବ୍ୟକ୍ତିଗତ ଭାବରେ ଭାବେ, ଯଦି ରାଫେଲ ଭଳି ପ୍ରସଙ୍ଗକୁ ସୁପ୍ରିମକୋର୍ଟରେ ଉଠାଯିବ, ଯଦି ଆପଣ ପ୍ରତିରକ୍ଷା ଚୁକ୍ତି ପ୍ରଣାଳୀକୁ ରାଜନୈତିକ ରଙ୍ଗ ଦେବେ । ତାହେଲେ ସମ୍ପୂର୍ଣ୍ଣ ପ୍ରଣାଳୀ ପଛରେ ରହିଯିବ । ଅନ୍ୟ ସମସ୍ତ ଫାଇଲ ମଧ୍ୟ ମନ୍ଥର ଗତିରେ ଆଗକୁ ବଢ଼ିବ । କାରଣ ଲୋକେ ଅନେକ ସଚେତନ ହୋଇଯିବେ ବୋଲି ସେ କହିଛନ୍ତି ।
ଏହା ସହିତ ବୋଫୋର୍ସ ଚୁକ୍ତିକୁ ନେଇ ସେ କହିଛନ୍ତି, ବୋଫୋର୍ସ ଚୁକ୍ତି ମଧ୍ୟ ବିବାଦରେ ଥିଲା । କିନ୍ତୁ ଏହି ତୋପ ବହୁତ ଭଲ କାମ କରିଥିଲା ।
