ନୂଆଦିଲ୍ଲୀ: ଭାରତୀୟ ବାୟୁସେନା ପକ୍ଷରୁ ପୂର୍ବତନ ବାୟୁସେନା ମୁଖ୍ୟ ବି.ଏସ ଧନୱାଙ୍କୁ ସମ୍ମାନ । ବାୟୁସେନାରେ ସାମିଲ ୩୦ଟି ରାଫେଲ ଯୁଦ୍ଧ ବିମାନର 'ଟେଲ ନମ୍ବର' ରଖାଯିବ 'ବିଏସ୍' । ଯାହା ଧନୱାଙ୍କ ନାମାନୁସାରେ ରହିବ ।
ସେହିପରି 6ଟି ରାଫେଲ ପ୍ରଶିକ୍ଷଣ ବିମାନରେ 'ଟେଲ ନମ୍ବର'ରେ 'ଆରବୀ' ଶୃଙ୍ଖଳା ରହିଛି । ଯାହା ବର୍ତ୍ତମାନର ବାୟୁସେନା ମୁଖ୍ୟ ଏୟାର ଚିଫ୍ ମାର୍ସାଲ ରାକେଶ କୁମାର ସିଂ ଭଦୋରିଆଙ୍କ ନାମାନୁସାରେ ରହିଛି । ଭଦୋରିଆ ମଧ୍ୟସ୍ତି ହିସାବରେ ବିମାନ କିଣିବାରେ ମୁଖ୍ୟ ଭୂମିକା ତୁଲାଇଛନ୍ତି ।
ଫ୍ରାନ୍ସର ଡାସଲ୍ଟ ଏଭିଏସନ କମ୍ପାନୀ ଠାରୁ 59 ହଜାର କୋଟି ଟଙ୍କାରେ 36ଟି ରାଫେଲ ବିମାନ କ୍ରୟ କାରବାରକୁ ନେଇ ଅନେକ ରାଜନୈତିକ ବିବାଦ ଉପୁଜିଥିଲା । ଏହି ବିବାଦ ଧନୱା ବାୟୁସେନା ମୁଖ୍ୟ ଥିବା ସମୟରେ ଚରମ ସୀମାରେ ପହଞ୍ଚିଥିଲା । ମାତ୍ର ସେ କାରବାରକୁ ଦୃଢତାର ସହ ରକ୍ଷା କରିଥିଲେ । ତେବେ ବାୟୁସେନାର ଜଣେ ବରିଷ୍ଠ ଅଧିକାରୀ କହିଛନ୍ତି, ପ୍ରଶିକ୍ଷଣ ବିମାନ ବ୍ୟତୀତ ଅନ୍ୟ ସମସ୍ତ ରାଫେଲ ଯୁଦ୍ଧବିମାନର ଟେଲ ନମ୍ବରକୁ ଧନୱାଙ୍କ ନାମରେ ନାମିତ କରାଯିବ । ଧନୱାଙ୍କ ଏହି ବିମାନ କ୍ରୟ କାରବାରରେ ଉଲ୍ଲେଖନୀୟ ଅବଦାନ ରହିଛି । ଏହିପରି କରି ବାୟୁସେନା ପକ୍ଷରୁ ତାଙ୍କୁ ଧନ୍ୟବାଦ ଦିଆଯାଉଛି ।
