ନୂଆଦିଲ୍ଲୀ: 11 ମାସର କୁନି ଝିଅ ପାଇଁ ପ୍ଲାଷ୍ଟିକ କଣ୍ଢେଇର ହେଲା ବ୍ୟାଣ୍ଡେଜ । ଘଟଣାଟି ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ । ଘଟଣାଟି ଘଟିଛି ଦିଲ୍ଲୀର ଲୋକନାୟକ ଜୟପ୍ରକାଶ ଡାକ୍ତରଖାନାରେ । କାରଣ ଉକ୍ତ ନାବାଳିକାଟି ନିଜ କଣ୍ଢେଇ ଏତେ ମାତ୍ରାରେ ଭଲ ପାଉଥିଲା ଯେ ଡାକ୍ତରଙ୍କୁ ଏପରି କରିବାକୁ ବାଧ୍ୟ କରିଛି ।
ମିଳିଥିବା ସୂଚନା ମୁତାବକ ଉକ୍ତ ଦିଲ୍ଲୀର ଦରିଆଗଞ୍ଜ ଅଞ୍ଚଳର 11 ମାସର ଶିଶୁ ଫରିନ କଣ୍ଢେଇ ସହିତ ଖେଳୁଥିବା ସମୟରେ ଖଟରୁ ପଡ଼ି ଯାଇଥିଲା । ତେବେ ଖଟରୁ ପଡ଼ିଯିବା ଫଳରେ ଗୋଡର ହାଡ଼ ଭାଙ୍ଗି ଯାଇଥିଲା । ଏହା ପରେ ଉକ୍ତ ଶିଶୁର ବାପା ମାଆ ଡ଼ାକ୍ତରଖାନାକୁ ଚିକିତ୍ସା ପାଇଁ ଆଣିଥିଲେ । ଉକ୍ତ ଶିଶୁର ଗୋଡ଼ର ହାଡ଼ରେ ସାମାନ୍ୟ ଫଟା ଦାଗ ରହିଥିଲା । ତାହାକୁ ସୁସ୍ଥ କରିବା ପାଇଁ ଗୋଡ଼କୁ ପ୍ଲାଷ୍ଟର କରିବାର ଆବଶ୍ୟକତା ରହିଥିଲା ।
ତେବେ ଚିକିତ୍ସା ଆରମ୍ଭରୁ ଶିଶୁଟି ପ୍ରବଳ ମାତ୍ରାରେ କାନ୍ଦିବାକୁ ଲାଗିଥିଲା । ପ୍ଲାଷ୍ଟର କରିବାକୁ ବହୁତ ଅସୁବିଧା ମଧ୍ୟ ହୋଇଥିଲା । ସେପଟେ ଉକ୍ତ ଶିଶୁଟି ତାର କଣ୍ଢେଇକୁ ଆଣିବାକୁ ବାରମ୍ବାର କହୁଥିଲା । ତାର କଣ୍ଢେଇକୁ ଡାକ୍ତରଖାନା ଆଣିବା ପରେ ଉକ୍ତ ଶିଶୁଟି ସାମାନ୍ୟ ଖୁସି ହେଉଥିବା ଡ଼ାକ୍ତର ଜାଣିବାକୁ ପାଇଥିଲେ । ପରେ ଚିକିତ୍ସାରେ ସାମାନ୍ୟ ଆଶ୍ବସ୍ତି ପାଇଁ ପ୍ରଥମେ କଣ୍ଢେଇର ଚିକିତ୍ସା କରାଯାଇଥିଲା ଓ ପରେ ଶିଶୁଟିର ।
ଏହି ଚିକିତ୍ସା ସମୟରେ ଶିଶୁଟି ସାମାନ୍ୟ ମଧ୍ୟ କାନ୍ଦି ନଥିଲା । ଏହା ଦେଖି ସମସ୍ତେ ତାଜୁବ ମଧ୍ୟ ହୋଇଯାଇଥିଲେ । ଏହା ଦେଖି ପରିବାର ଲୋକେ କହିଥିଲେ କି, ଫରିନ ଯେତେବେଳେ 2 ମାସର ଥିଲା ସେତେବେଳେ ତାଙ୍କୁ ଏହି କଣ୍ଢେଇଟି ଉପହାର ସ୍ବରୂପ ମିଳିଥିଲା । ଆଉ ସେବେଠାରୁ କଣ୍ଢେଇକୁ ଫରିନ ଭଲପାଉଥିବା ପରିବାର ଲୋକେ କହିଛନ୍ତି ।
