ନୂଆଦିଲ୍ଲୀ: ଆଜି(ସୋମବାର)ଠାରୁ କର୍ତାରପୁର କରିଡର ଖୋଲିବାକୁ ପାକିସ୍ତାନ ଘୋଷଣା କରିଛି । ଏଯାବତ ଭାରତ ପଟୁ ଏନେଇ କୌଣସି ଚୂଡାନ୍ତ ହୋଇନାହିଁ । ଶିରୋମଣି ଗୁରୁଦ୍ବାରା ପ୍ରବନ୍ଧକ କମିଟିର ମୁଖ୍ୟ ସଚିବ ଡ.ରୁପ ସିଂ କହିଛନ୍ତି କୋରିଡର ଖୋଲିବାର ଶେଷ ନିଷ୍ପତ୍ତି କେନ୍ଦ୍ର ସରକାରଙ୍କ ଉପରେ ନିର୍ଭର କରେ ।
ସେ କହିଛନ୍ତି, କର୍ତାରପୁର କରିଡର ନିଶ୍ଚୟ ଖୋଲିବା ଜରୁରୀ । ଶିରୋମଣି ଗୁରୁଦ୍ବାରା ପ୍ରବନ୍ଧକ କମିଟି ମଧ୍ୟ ଚାହେଁ ତୁରନ୍ତ ଏହି କରିଡରକୁ ପୁନଃ ଖୋଲାଯାଉ । କିନ୍ତୁ ଏହାର ସମ୍ପୂର୍ଣ୍ଣ ନିଷ୍ପତ୍ତି କେନ୍ଦ୍ର ଉପରେ ନିର୍ଭର କରେ ବୋଲି ଡ.ସିଂହ କହିଛନ୍ତି ।
ଟ୍ୱିଟରରେ ପାକିସ୍ତାନର ବୈଦେଶିକ ମନ୍ତ୍ରୀ ଶାହା ମହମୁଦ କୁରେଶି କହିଛନ୍ତି ଯେ, କର୍ତାରପୁର ଗୁରୁଦ୍ୱାର ଦରବାର ସାହିବକୁ 4.7 କିଲୋମିଟର ରାସ୍ତା ଖୋଲିବାକୁ ପାକିସ୍ତାନ ପ୍ରସ୍ତୁତ ଥିବା ଭାରତୀୟଙ୍କୁ ଜଣାଇଥିଲା ।
କର୍ତାରପୁର ସାହିବ କରିଡର ହେଉଛି 4.7 କିଲୋମିଟର ଲମ୍ୱା ରାସ୍ତା ଯାହାକି ଭାରତର ଗୁରୁ ଦାସପୁରର ଡେରା ବାବା ନାନକ ସାହିବ ଏବଂ ପାକିସ୍ଥାନର କର୍ତାରପୁରରେ ଗୁରୁଦ୍ୱାର ଦରବାର ସାହିବକୁ ସଂଯୋଗ କରେ । ଗତ ବର୍ଷ ଏହାର ଉଦଘାଟନ କରାଯାଇଥିଲା । କୋରୋନା ସଂକ୍ରମଣ ପାଇଁ କରିଡରକୁ ବନ୍ଦ କରାଯାଇଥିଲା ।
