ନୋଏଡା: ନୋଏଡାର ସେକ୍ଟର-135 ସ୍ଥିତ ଫାର୍ମ ହାଉସରେ ଚାଲିଥିବା ରେଭ ପାର୍ଟି ଘଟଣାରେ ନୂଆ ତଥ୍ୟ ସାମ୍ନାକୁ ଆସିଛି । ଏହି ଘଟଣାରେ ଫାର୍ମହାଉସ ମାଲିକ ସହ 4ଜଣଙ୍କୁ ଗିରଫ କରିଛନ୍ତି ନୋଏଡା ଏସଏସପି ବୈଭବ କୃଷ୍ଣ ।
ସୂଚନା ଅନୁଯାୟୀ, ପାର୍ଟି ଆୟୋଜନ କରିଥିବା ଯୁବକଯୁବତୀମାନେ ରେଭ୍ ପାର୍ଟି କରିବା ପାଇଁ ମାଲିକ ଅମିତ୍ ଯୋଗୀଙ୍କୁ 30 ହଜାର ଟଙ୍କା ଲାଞ୍ଚ ଦେଇଥିଲେ । ଏଥିସହ ଏହି ପାର୍ଟି ଆୟୋଜନରେ 4ଜଣ ପୁରୁଷ ଏବଂ 6 ଜଣ ମହିଳା ସମ୍ପୃକ୍ତ ଥିବା ନେଇ ପୋଲିସର ତଦନ୍ତରୁ ଜଣାପଡିଛି ।
ସେପଟେ ଏହି ମାମଲାରେ ଗିରଫ ହୋଇଥିବା 192 ଜଣ ଅଭିଯୁକ୍ତଙ୍କୁ ରବିବାର ରାତି ପ୍ରାୟ 12ଟା ସମୟରେ କୋର୍ଟରେ ହାଜର କରାଯାଇଥିଲା । ଏହାପରେ ସମସ୍ତ ଅଭିଯୁକ୍ତଙ୍କୁ ଜେଲ ପଠାଯାଇଥିଲା । ସେହିପରି ଏହି ଘଟଣାରେ ସ୍ଥାନୀୟ ପୋଲିସକୁ ମଧ୍ୟ ସନ୍ଦେହ ଘେରରେ ରଖାଯାଇଛି । ଯାହାଫଳରେ ସେମାନଙ୍କ ଉପରେ ମଧ୍ୟ ତଦନ୍ତ କରାଯାଉଛି ।
ପ୍ରକାଶ ଥାଉକି, ଗତ ଶନିବାର ରାତିରେ ନୋଏଡା ଏସଏସପି ବୈଭବ କୃଷ୍ଣ ସେକ୍ଟର-135 ସ୍ଥିତ ଫାର୍ମ ହାଉସରେ ଚଢାଉ କରିଥିଲେ । ସେଠାରେ ଅବୈଧ ରୂପରେ ମଦ ଏବଂ ତମ୍ବାଖୁ ପରସା ଯାଉଥିବା ସମୟରେ ଏହି ଚଢାଉ କରାଯାଇଥିଲା । ତେବେ ପୋଲିସ ଏହି ଘଟଣାରେ 192 ଜଣ ଅଭିଯୁକ୍ତ ସହ ମାଲିକ ଅମିତ୍ ଯୋଗୀ ଏବଂ ତାଙ୍କର ଚାରି ବନ୍ଧୁ କପିଲ ସିଂ, ପଙ୍କଜ ଶର୍ମା, ଆନନ୍ଦ ଏବଂ ବାଲାସଙ୍କୁ ମଧ୍ୟ ଘଟଣାସ୍ଥଳରୁ ଗିରଫ କରିଛନ୍ତି ।
