ନୂଆଦିଲ୍ଲୀ: ଦୁଇ ନକଲି ଆଇଏଏସ ଅଫିସରଙ୍କୁ ଗିରଫ କରିଛି ପୋଲିସ । ଲୋକଙ୍କ ଉପରେ ରୁବାବ ଝାଡ଼ୁଥିବା ଏହି ଦୁଇ ନକଲି ଆଇଏଏସ ଅଧିକାରୀଙ୍କୁ ଦିଲ୍ଲୀର କନ୍ନଟ ପ୍ୟାଲେସ ଅଞ୍ଚଳରୁ ଗିରଫ କରିଛି ।
ଗିରଫ ହୋଇଥିବା ଦୁଇ ନକଲି ଆଇଏଏସ ଅଫିସର ହେଲେ 34 ବର୍ଷୀୟ ଶିବ ଚୌହାନ ଓ 40 ବର୍ଷୀୟ କିଶାନ କୁମାର । ପୋଲିସର କହିବା ମୁତାବକ, ଏମାନେ ନିଜକୁ ନ୍ୟାସନାଲ ସ୍କିଲ ଡେଭଲପମେଣ୍ଟ ସେଣ୍ଟର ସହ କିଛି ଅନ୍ୟ ପ୍ରମୁଖ ସରକାରୀ ବିଭାଗର ଅଧିକାରୀ କହି ସାଧାରଣ ଲୋକଙ୍କୁ ଭୁଆଁ ବନେଇ ଆସୁଥିଲେ ।
କେବଳ ଏତିକି ନୁହେଁ, ଭାରତ ସରକାର ଲେଖାଥିବା ଧଳା ଫରଫର କାରରେ ବସି ବୁଲୁଥିଲେ । ଏନେଇ ଲୋକଙ୍କ ଠାରୁ ଅଭିଯୋଗ ପାଇବା ପରେ ପୋଲିସ ଅଭିଯୋଗକୁ ଗୁରୁତର ସହ ନେଇ ଦୁଇ ଜଣଙ୍କୁ ଗିରଫ କରିଛି ।
ଏମାନଙ୍କ ନିକଟରୁ ସରକାରୀ ବିଭାଗର ଜାଲ କାଗଜପତ୍ର, ଷ୍ଟାମ୍ପ ସହ ସରକାରୀ ବିଭାଗ ସମ୍ବନ୍ଧୀୟ ଅନେକ ଜାଲ ଜିନିଷ ଜବତ କରିଛି ପୋଲିସ ।
