ଶ୍ରୀନଗର: ଲଗାତାର କିଛି ଦିନ ଧରି ଅଶାନ୍ତ ରହୁଛି ଜମ୍ମୁ-କାଶ୍ମୀର । ଏଠାରେ ସୋପୋର ଜିଲ୍ଲାର ମାଲମାପାନପୋରରେ ସୁରକ୍ଷାବଳ ଓ ଆତଙ୍କୀ ମଧ୍ୟରେ ଗୁଳିବିନିମୟ ଜାରି ରହିଛି । ଏଥିରେ ଜଣେ ଯବାନ ଆହତ ହୋଇଥିବାବେଳେ ଜଣେ ଆତଙ୍କୀ ନିହତ ହୋଇଛି । ଆତଙ୍କବାଦୀଙ୍କୁ ଧରିବା ପାଇଁ ସେନାର 22 ରାଷ୍ଟ୍ରୀୟ ରାଇଫଲ୍ , ଏସଓଜି ଏବଂ ସିଆରପିଏଫ୍ର ସଂଯୁକ୍ତ ଟିମ୍ ପକ୍ଷରୁ ବାରପୋରା ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି ।
ପୋଲିସର ଜଣେ ବରିଷ୍ଠ ପୋଲିସ ଅଧିକାରୀଙ୍କ କହିବାନୁଯାୟୀ, ମାଲମାପାନପୋରାରେ ଘେରାବନ୍ଦୀ କରିବା ପରେ ଆତଙ୍କବାଦୀ ଏବଂ ସୁରକ୍ଷାବଳ ମଧ୍ୟରେ ଗୁଳିବିନିମୟ ହୋଇଥିଲା । ଏହାପରେ ସୁରକ୍ଷାବଳ ସମ୍ପୂର୍ଣ୍ଣ ଅଞ୍ଚଳକୁ ଘେରାବନ୍ଦୀ କରିଛନ୍ତି ।
ଏହାପୂର୍ବରୁ ଶୁକ୍ରବାର ଜମ୍ମୁ-କାଶ୍ମୀରର ସୋପିଆନ ଜିଲ୍ଲାରେ ସୁରକ୍ଷାବଳ ଓ ଆତଙ୍କୀ ମଧ୍ୟରେ ଗୁଳିବିନିମୟ ହୋଇଥିଲା । ସୁରକ୍ଷାକର୍ମୀଙ୍କ ଗୁଳିରେ ଜୈଶ-ମହମ୍ମଦର ଜଣେ ଆତଙ୍କବାଦୀ ନିହତ ହୋଇଥିଲା । ମୃତ ଆତଙ୍କୀ ହେଉଛି ଜିନତ୍ ଇସଲାମ୍ । ଅନେକ ନାଗରିକଙ୍କ ହତ୍ୟା ଏବଂ ଆତଙ୍କୀ ଆକ୍ରମଣରେ ତାର ହାତ ରହିଥିଲା ।
