ଭୋପାଳ: ପର ଘରେ ବାସନ ମାଜି, ଝାଡୁ ପୋଛା ମାରି ପେଟ ପୋଷୁଥିବା ଗରିବ ମହିଳାଙ୍କ ନାଁରେ ଆସିଲା ଦେଢ ଲକ୍ଷ ଟଙ୍କାର ବିଦ୍ୟୁତ ବିଲ । ମଧ୍ୟପ୍ରଦେଶ ସତନା ଜିଲ୍ଲାରୁ ଆସିଛି ଏଭଳି ଘଟଣା । ଗରିବ ମହିଳାଙ୍କ ଘରେ ପହଞ୍ଚିଛି 1.50ଲକ୍ଷର ବିଜୁଳି ବିଲ୍ । 100 ଟଙ୍କାରୁ ଊର୍ଦ୍ଧ୍ବ ବିଲ୍ ଆସୁ ନଥିବାବେଳେ ଏକାଥରେ ଏତେ ଟଙ୍କାର ବିଲ ଗରିବ ଦମ୍ପତିଙ୍କ ମୁଣ୍ଡରେ ଚଡକ ପକାଇଛି । ଅନ୍ୟପଟେ ବିଜୁଳି କଟିବା ଭୟରେ ମହିଳା ଜଣକ ଅଫିସରୁ ଅଫିସ ଘୁରି ବୁଲୁଛନ୍ତି । ମାତ୍ର ତାଙ୍କୁ କୁହାଯାଇଛି ଯେ, ପୁରା ବିଲ ପୈଠ କରିବାକୁ ପଡିବ । ଅନ୍ୟପଟେ ସୋସିଆଲ ମିଡିଆରେ ବିଦ୍ୟୁତ ବିଲ୍ ଭାଇରାଲ ହେବା ପରେ ଏଥିରେ ସୁଧାର କରାଯିବ ବୋଲି ଜଣାଯାଇଛି ।
ସୂଚନା ଯେ, ଏକ ଟଙ୍କାରେ ଏକ ୟୁନିଟରେ ବିଦ୍ୟୁତ ଦେବା ପାଇଁ ମଧ୍ୟପ୍ରଦେଶ ସରକାର ଦାବି କରିଥିଲେ, କିନ୍ତୁ ଏହି ଦାବିର ମୂଳ ବାସ୍ତବତା ଅନ୍ୟ କିଛି ବୋଲି ଏହି ଘଟଣା ପ୍ରମାଣିତ କରୁଛି । ଯଦି ଜଣେ ଗରିବଙ୍କ ଘର 1.25 ଲକ୍ଷ ବିଦ୍ୟୁତ ବିଲ ପହଞ୍ଚେ, ତେବେ ଗରିବଙ୍କୁ ଘର ବିକ୍ରୟ କରି ବିଦ୍ୟୁତ ବିଲ୍ ପୈଠ କରିବା ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ । ରାଜ୍ୟ ସରକାରଙ୍କ କହିବା ଓ ଏହାକୁ କାର୍ଯ୍ୟକାରୀ କରିବା ପ୍ରହସନ ପାଲଟିଛି ।
ମଧ୍ୟପ୍ରଦେଶର ସତନା ଜିଲ୍ଲାର ବାଜରା ଟୋଲା ଜୁଲେଲାଲ ମନ୍ଦିର ନିବାସୀ ତୁଲସୀ ସୋଧିଆ, ସ୍ବାମୀ ପ୍ରେମଲାଲ ସୋଧିଆଙ୍କ ଘରକୁ ଆସିଛି 1.25 ଲକ୍ଷର ବିଜୁଳି ବିଲ୍ । ସେମାନଙ୍କ ଘରର ବିଦ୍ୟୁତ୍ ବିଲ କେବେ ହେଲେ 100 ଟଙ୍କା ଅତିକ୍ରମ କରିନଥିଲା । ମାତ୍ର ବର୍ତ୍ତମାନ ଲଗାତାର ତିନିମାସ ପାଇଁ 1 ଲକ୍ଷରୁ ଅଧିକ ବିଲ୍ ଅତ୍ୟନ୍ତ ଆସିଛି । ଉଭୟ ସ୍ବାମୀ ଏବଂ ସ୍ତ୍ରୀ ଗୋଟିଏ କୋଠରୀରେ ରୁହନ୍ତି । ଘରେ ଗୋଟିଏ ଫ୍ୟାନ୍ ଏବଂ ବଲବ । ଏପରିସ୍ଥଳେ ବିଜୁଳି ବିଲ 125163 ଟଙ୍କା ଆସିଛି ।
ବିଦ୍ୟୁତ୍ ବିଭାଗର ଅଧିକାରୀଙ୍କ ନିକଟରେ ନିବେଦନ କରିବା ପରେ ମଧ୍ୟ ସେମାନଙ୍କର ବିଲରେ ସୁଧାର କରାଯିବ ନାହିଁ ବୋଲି ବିଭାଗୀୟ ଅଧିକାରୀ ସ୍ପଷ୍ଟ କରିଥିଲେ । ତେଣୁ ମହିଳା ନ୍ୟାୟ ପାଇଁ ପ୍ରଶାସନକୁ ନିବେଦନ କରିଛନ୍ତି।
ଶେଷରେ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବା ପରେ ବିଦ୍ୟୁତ ବିଭାଗ ଏହା ଉପରେ ବିଚାର କରି ସମାଧାନ କରିବା ପାଇଁ ପ୍ରତିଶ୍ରୁତି ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
