ନୂଆଦିଲ୍ଲୀ: ଆମ ଆଦମୀ ପାର୍ଟୀ(ଆପ)କୁ ଭରପୁର ପ୍ରଶଂସା କରିଛନ୍ତି ଅଭିନେତାରୁ ନେତା ପାଲଟିଥିବା ପ୍ରକାଶ ରାଜ । ଦିଲ୍ଲୀରେ ପହଞ୍ଚି ସେ ଆପ ପାଇଁ ଭୋଟଭିକ୍ଷା କରିଛନ୍ତି । ଶନିବାର ଠାରୁ ସେ ଆପ ପାଇଁ ଦିଲ୍ଲୀରେ ପ୍ରଚାର ମୈଦାନକୁ ଓହ୍ଲାଇଛନ୍ତି ।
ଏନେଇ ସେ କହିଛନ୍ତି ଯେ ଆପ ସହିତ ସାମିଲ ହୋଇ ମୁଁ ନିଜକୁ ବେଶ ଗର୍ବ ଅନୁଭବ କରୁଛି । ଖୁସି ମଧ୍ୟ । ମୁଁ ଆମ ଆଦମୀ ପାର୍ଟି ପକ୍ଷରୁ ଲଢୁନାହିଁ, ଏହା ସତ । ମାତ୍ର ମୁଁ ସେମାନଙ୍କ ମଧ୍ୟରୁ ଜଣେ ସାଧାରଣ ଲୋକ, ଯିଏକି ଏହି ଦଳର ଲକ୍ଷ୍ୟ ଓ ଉଦ୍ଦେଶ୍ୟରେ ନିହାତି ଭାବେ ଅନୁପ୍ରାଣିତ । ମୁଁ ଏଠାକୁ ଆସିଛି ଆପର ପ୍ରାର୍ଥୀଙ୍କୁ ସମର୍ଥନ କରିବାକୁ ।
ସେ ଆହୁରି ମଧ୍ୟ କହିଛନ୍ତି କି ଦେଶ ବର୍ତ୍ତମାନ ପରିସ୍ଥିତିରେ ଯାହା ଚାହୁଁଛି, ଏହି ଦଳ ତାହା କରିପାରିବ ବୋଲି ତାଙ୍କର ବିଶ୍ବାସ ଓ ଭରସା ରହିଛି । ତେବେ ଏହି ଦଳର ଚିନ୍ତାଧାରା ଭିନ୍ନ ହୋଇପାରେ । ଆମେ ଏହି ଦଳର ଚିନ୍ତାଧାରାକୁ ସମର୍ଥନ ଜଣାଇ ଆଗକୁ ଆସିବା ଆବଶ୍ୟକ ବୋଲି ସେ କହିଛନ୍ତି ।
ସେ ଦଳକୁ ପ୍ରଶଂସା କରି କହିଛନ୍ତି କି ସେ ଏହି ଦଳକୁ ବହୁତ ଭଲ ପାଇଥାନ୍ତି । କେବଳ ଦଳକୁ ନୁହେଁ, ଦଳର ଇସ୍ତାହାରରେ ଦିଆଯାଇଥିବା ପ୍ରତିଶ୍ରୁତକୁ ମଧ୍ୟ ବହୁତ ଭଲପାଏ ବୋଲି ସେ କହିଛନ୍ତି । ତେବେ ଏହା ମୋର କର୍ତ୍ତବ୍ୟ ଯେ, ମୁଁ ଏହି ଦଳର ପ୍ରାର୍ଥୀଙ୍କୁ ସମର୍ଥନ ଜଣାଇବା ଓ ଏହାପାଇଁ ମୁଁ ଦିଲ୍ଲୀ ଆସିଛି ବୋଲି ସେ କହିଛନ୍ତି ।
ନିର୍ବାଚନ ପରେ ଏହା ଭାବିବା ନିଶ୍ଚିତ ୟେ, ଦେଶ ପାଇଁ କଣ ଆବଶ୍ୟକ । ଏହା ଭାବିବା ଉଚିତ ନୁହେଁ ଯେ ଜାତୀୟ ଦଳଗୁଡ଼ିକ କେଉଁ ମୁଦ୍ଦା ନେଇ ନିର୍ବାଚନ ଲଢୁଛନ୍ତି । ନିର୍ବାଚନ ଗରିବଙ୍କ ଉପରେ ରାଜୁତି କରିବାର ପର୍ବ ନୁହେଁ, ଗରିବଙ୍କ ସେବା କରିବାର ସୁଯୋଗ ବୋଲି ସେ କହିଛନ୍ତି ।
