ନୂଆଦିଲ୍ଲୀ: ଗୃହମନ୍ତ୍ରୀ ଅମିତ ଶାହାଙ୍କୁ ଚିଠି ଲେଖିଲା ଦିଲ୍ଲୀ ମେଡିକାଲ ଆସୋସିଏସନ (ଡିଏମଏ) । ଡାକ୍ତରଙ୍କୁ ଦରମା ଦିଆଯାଇନଥିବା ଅଭିଯୋଗରେ ଗୃହମନ୍ତ୍ରୀଙ୍କ ହସ୍ତକ୍ଷେପ ଲୋଡିଲା ଡିଏମଏ । କସ୍ତୁରବା ହସ୍ପିଟାଲ ଏବଂ ହିନ୍ଦୁ ରାଓ ହସ୍ପିଟାଲ ସମେତ ଉତ୍ତର ଦିଲ୍ଲୀ ମ୍ୟୁନିସିପାଲ କର୍ପୋରେସନ ଅନ୍ତର୍ଗତ ବିଭିନ୍ନ ସ୍ୱାସ୍ଥ୍ୟକେନ୍ଦ୍ରର ଡାକ୍ତରଙ୍କୁ ଗତ 3 ମାସ ହେବ ଦରମା ମିଳିନାହିଁ ।
ବୁଧବାର ଏନଡିଏମସିର 450 ଶଯ୍ୟା ବିଶିଷ୍ଟ କସ୍ତୁରବା ହସ୍ପିଟାଲର ରେସିଡେଣ୍ଟ ଡାକ୍ତରମାନେ ତିନି ମାସର ଦରମା ନ ପାଇବାରୁ ସାମୂହିକ ଭାବେ ଇସ୍ତଫା ଦେବାକୁ ଧମକ ଦେଇଛନ୍ତି। ନିକଟରେ ହିନ୍ଦୁ ରାଓ ହସ୍ପିଟାଲର ବାସିନ୍ଦା ଡାକ୍ତରମାନେ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଚିଠି ଲେଖି ତାଙ୍କ ଦରମା ମୁକ୍ତ କରିବାକୁ ହସ୍ତକ୍ଷେପ ଲୋଡିଥିଲେ ।
ଶାହାଙ୍କୁ ଲେଖିଥିବା ଚିଠିରେ ଡିଏମଏ କହିଛି ଯେ, କୋଭିଡ -19 ମହାମାରୀ ସମୟରେ ଡାକ୍ତରମାନେ ମାସ ମାସ ଧରି ନିସ୍ବାର୍ଥପର ଓ ନିରନ୍ତର ଭାବେ କାର୍ଯ୍ୟ କରୁଆସୁଛନ୍ତି । ଉତ୍ତର ଦିଲ୍ଲୀ ମ୍ୟୁନିସିପାଲ କର୍ପୋରେସନ ଅଧୀନରେ ଥିବା କସ୍ତୁରବା ହସ୍ପିଟାଲ, ହିନ୍ଦୁ ରାଓ ହସ୍ପିଟାଲ ଏବଂ ଅନ୍ୟାନ୍ୟ ଡାକ୍ତରଖାନା ତଥା ଡିସପେନସାରିର ରେସିଡେଣ୍ଟ ଡାକ୍ତରଙ୍କୁ ଦରମା ଦିଆଯାଇନାହିଁ ।
ଏଥିସହ ଆହୁରି କୁହାଯାଇଛି ଯେ, କୋଭିଡ ମୁକାବିଲାର ଏମାନଙ୍କୁ କୋରୋନା ଯୋଦ୍ଧା କୁହାଯାଉଛି । ନିଜ ଜୀବନକୁ ବାଜିରେ ଲଗାଇ ସମାଜ ରକ୍ଷା ଦିଗରେ କାମ କରୁଥାନ୍ତି । ନିସ୍ବାର୍ଥ ଓ ନିରନ୍ତର ଲୋକଙ୍କ ସେବା କରୁଛନ୍ତି । ସେମାନେ କେବଳ ନିଜ ପାଇଁ ନୁହେଁ ନିଜ ପରିବାର ପାଇଁ ବିପଦକୁ ମୁଣ୍ଡାଇଛନ୍ତି ।
