ଇନ୍ଦୋର: ସବୁବେଳେ ନିଜ ବିବାଦୀୟ ବୟାନ ଯୋଗୁଁ ଚର୍ଚ୍ଚାରେ ରହୁଥିବା କଂଗ୍ରେସ ନେତା ଦିଗବିଜୟ ସିଂହ ପୁଣିଥରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । ଏଥର ରାଫେଲ ଡିଲକୁ ନେଇ ସେ ମୋଦି ସରକାରଙ୍କୁ ଘେରିଛନ୍ତି। ଏହି ଡିଲରେ ହୋଇଥିବା ଅର୍ଥ କାରବାରକୁ ସାର୍ବଜନୀନ କରିବାକୁ ସେ କେନ୍ଦ୍ର ସରକାରଙ୍କୁ ଆହ୍ବାନ ଦେଇଛନ୍ତି ।
ମଙ୍ଗଳବାର ଫ୍ରାନ୍ସରେ ଶସ୍ତ୍ର ପୂଜା ପରେ ପ୍ରଥମ ରାଫେଲ ବିମାନ ଗ୍ରହଣ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ତେବେ ଏହାକୁ ନେଇ ରାଜନୀତି ଜୋର ଧରିଛି । କଂଗ୍ରେସ ଏହାକୁ ସରକାରଙ୍କ ରାଫେଲ ରାଜନୀତି ବୋଲି କହିଛି। ସେହିପରି ବିରୋଧୀଙ୍କୁ ଏହାର ଜବାବ ଦେଇଛନ୍ତି ଗୃହମନ୍ତ୍ରୀ ଅମିତ ଶାହ।
ତେବେ ବୁଧବାର ଦିଗବିଜୟ ସିଂହ କହିଛନ୍ତି, ଯେ ଭାରତକୁ ରାଫେଲ ଆସୁଥିବାରୁ ସେ ବହୁତ ଖୁସି । ହେଲେ 126ଟି ବଦଳରେ ମାତ୍ର 36ଟି ରାଫେଲ କାହିଁକି ଆସୁଛି ସେନେଇ ସେ ପ୍ରଶ୍ନ କରିଛନ୍ତି।
ଭାରତରେ ଏହି ଲଢୁଆ ବିମାନର ପଦାର୍ପଣକୁ କଂଗ୍ରେସ ସ୍ବାଗତ କରୁଛି । କିନ୍ତୁ ଅଳ୍ପ ସଂଖ୍ୟକ ବିମାନ ଆଣିବା ପଛରେ ମୋଦି ସରକାରଙ୍କ କଣ ଉଦ୍ଦେଶ୍ୟ ରହିଛି ତାହା ବୁଝାପଡୁନି । ଏହାସହ ରାଫେଲ ଡିଲରେ କେତେ ଅର୍ଥ କାରବାର ହୋଇଛି ତାହା ମଧ୍ୟ କେହି ଜାଣିନାହାଁନ୍ତି। ରାଫେଲ ଭଳି ଶ୍ରେଷ୍ଠ ଯୁଦ୍ଧ ବିମାନ କିଣିଥିବାରୁ କେନ୍ଦ୍ର ସରକାରଙ୍କୁ ଧନ୍ୟବାଦ । କିନ୍ତୁ ଏହାର ପ୍ରକୃତ ଡିଲ କେତେ ତାହା ନା କଂଗ୍ରେସ ନା ଦେଶ କେହି ଜାଣିନାହାଁନ୍ତି ବୋଲି ସେ କହିଛନ୍ତି।
ତେବେ ଏହି ଡିଲକୁ ସାର୍ବଜନୀନ କରିବାକୁ ସେ ମୋଦି ସରକାରଙ୍କୁ ଆହ୍ବାନ ଦେଇଛନ୍ତି । ସମସ୍ତ ଦେଶବାସୀଙ୍କର ଏହା ଜାଣିବାର ଅଧିକାର ରହିଛି । ତେଣୁ ଏହି ଡିଲର ଅର୍ଥ କେନ୍ଦ୍ର ସରକାର ଜଣାନ୍ତୁ । କଂଗ୍ରେସ ସବୁବେଳେ ଏହି ପ୍ରସଙ୍ଗକୁ ଉଠାଇବ ବୋଲି ଦିଗବିଜୟ ସିଂହ ସ୍ପଷ୍ଟ କରିଛନ୍ତି।