ନୂଆଦିଲ୍ଲୀ: ଦେଶ ରାଜଧାନୀରେ ବଢିବାରେ ଲାଗିଛି ବାୟୁ ପ୍ରଦୂଷଣର ମାତ୍ରା । ଛୁଆଠୁ ବୁଢା ସଭିଏଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ଏହି ପ୍ରଦୂଷଣରୁ ବଞ୍ଚିବା ପାଇଁ ସ୍କୁଲ ପିଲାଙ୍କ ପାଇଁ ଦିଲ୍ଲୀ ସରକାର ଜାରି କରିଛନ୍ତି ଏକ ସର୍କୁଲାର । ଯେଉଁଥିରେ ଏହା ସ୍ପଷ୍ଠ ଭାବରେ କୁହାଯାଇଛି ଯେ ଏହି ସମୟରେ ଛାତ୍ରଛାତ୍ରୀଙ୍କୁ ଆଉଟଡୋର ଆକଟିଭିଟି(ଖେଳକୁଦ)ପାଇଁ ଛଡାନଯାଉ ।
ଦିଲ୍ଲୀରେ ଏବେ ପ୍ରଦୂଷଣ ସାଙ୍ଘାତିକ ସ୍ତରରେ ପହଞ୍ଚିଛି । ଗୁରୁବାର କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆକଳନ ଅନୁସାରେ ଏୟାର କ୍ବାଲିଟି ଇଣ୍ଡେକ୍ସ 400 ରୁ ଅଧିକ ସ୍ତରରେ ପହଞ୍ଚିଛି । ପ୍ରଦୂଷଣ ମାତ୍ରା ଏତେ ମାତ୍ରାରେ ବଢିବାରେ ଲାଗିଛି ଯେ ଲୋକଙ୍କୁ ନିଃଶ୍ବାସ ନେବାରେ ଅସୁବିଧା ହେଉଛି । ସେପଟେ ଶ୍ବାସରୋଗୀଙ୍କ କଥା ନକହିବା ଭଲ ।
ଦିଲ୍ଲୀ ସରକାରର ଶିକ୍ଷା ନିର୍ଦ୍ଦେଶାଳୟ ସର୍କୁଲାର ମୁତାବକ ଦିଲ୍ଲୀର ସମସ୍ତ ଘରୋଇ ଓ ସରକାରୀ ସ୍କୁଲକୁ ନିର୍ଦ୍ଦେଶ ଦିଆଯାଇଛି ଯେ ଅଭିଭାବକମାନେ ବାୟୁ ପ୍ରଦୂଷଣ ସମ୍ବନ୍ଧରେ ନିଜ ପିଲାଙ୍କୁ ଅବଗତ କରାନ୍ତୁ । ଯେ ପର୍ଯ୍ୟନ୍ତ ବାୟୁ ପ୍ରଦୂଷଣ ମାତ୍ରା ଅଧିକ ରହିଛି ସେ ପର୍ଯ୍ୟନ୍ତ ଛୋଟ ପିଲାଙ୍କୁ ବାହାରେ ଖେଳ କୁଦ ଆଦି କାର୍ଯ୍ୟରୁ ଦୂରେଇ ରଖନ୍ତୁ । ଛୋଟଛୁଆଙ୍କ ସ୍ବାସ୍ଥ୍ୟକୁ ନଜରରେ ରଖି ଏହି ସର୍କୁଲାର ଜାରି କରାଯାଇଥିବା ବେଳେ ଦିଲ୍ଲୀ ସରକାର ଶୁକ୍ରବାର ପ୍ରତ୍ୟେକ ସ୍କୁଲ ଛାତ୍ରଛାତ୍ରୀଙ୍କୁ 2-2 ଟି ମାସ୍କ ପ୍ରଦାନ କରିବେ । ଯଦ୍ବାରା ଘରୁ ସ୍କୁଲ ଯିବା ସମୟରେ ପିଲାମାନେ ଏହି ମାସ୍କ ବ୍ୟବହାର କରି ଯିବା ଆସିବା କରିପାରିବେ ।
