ନୂଆଦିଲ୍ଲୀ: ଦିଲ୍ଲୀରେ ଦିନ ଦ୍ବିପ୍ରହରରେ ହତ୍ୟା । ହଜରତ ନିଜାମୁଦ୍ଦିନ ଅଞ୍ଚଳରେ ଜଣେ ଅଜଣା ଯୁବକ ଜଣେ ଯୁବତୀଙ୍କୁ ହତ୍ୟା କରିଛି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ବେଶ ଚାଞ୍ଚଲ୍ୟ ସୃଷ୍ଟି କରିଛି । ତେବେ ପୋଲିସ ଅଭିଯୁକ୍ତକୁ ଗିରଫ କରିଛି । ଏହି ହତ୍ୟାକାଣ୍ଡର ଏକ ଭିଡ଼ିଓ ଏବେ ଭାଇରାଲ ହେବାରେ ଲାଗିଛି ।
ମିଳିଥିବା ସୂଚନା ମୁତାବକ ସାଉଥ-ଇଷ୍ଟ ଜିଲ୍ଲାର ହଜରତ ନିଜାମୁଦ୍ଦିନ ଅଞ୍ଚଳରେ ଏହି ଘଟଣା ଘଟିଛି । ମୃତକ ଜଣକ ହଜରତ ନିଜାମୁଦ୍ଦିନ ଅଞ୍ଚଳର ଓ ସେ ବିଏ ପ୍ରଥମ ବର୍ଷର ଛାତ୍ରୀ ପ୍ରୀତି ବୋଲି ସୂଚନା ମିଳିଛି । କୌଣସି କାମରେ ପ୍ରୀତି ନିକଟସ୍ଥ ଭୋଗଲ ବଜାରକୁ ଯାଇ ଫେରୁଥିବା ବେଳେ ଘଟିଥିଲା ଏହି ହତ୍ୟାକାଣ୍ଡ। ତେବେ ଭାଇରାଲ ଭିଡ଼ିଓରେ ଦେଖିବାକୁ ମିଳୁଛି ଯେ ଜଣେ ଯୁବକ ପ୍ରୀତିକୁ ଛୁରାମାଡ଼ କରୁଛି । ବାରମ୍ବାର ଛୁରା ମାଡ଼ କରିବା ପରେ ପ୍ରୀତି ଗୁରୁତର ଅବସ୍ଥାରେ ତଳେ ପଡ଼ି ଯାଇଛନ୍ତି ।
ପରେ ଏହି ଘଟଣାକୁ ସ୍ଥାନୀୟ କିଛି ମହିଳା ଦେଖିବା ସହିତ ତାଙ୍କୁ ଏକ ଅଟୋରେ ଡାକ୍ତରଖାନାକୁ ନେଉଛନ୍ତି । ତେବେ ଅନ୍ୟ କିଛି ଲୋକ ହତ୍ୟାକାରୀକୁ ଧରି ନିର୍ଦ୍ଧୁମ ମାଡ଼ ମାରୁଥିବାର ଦୃଶ୍ୟ ଉକ୍ତ ଭାଇରାଲ ଭିଡ଼ିଓରେ ଦେଖିବାକୁ ମିଳୁଛି । ଏହି ସମ୍ପର୍କରେ ଘଟଣାସ୍ଥଳରେ ପହଞ୍ଚି ଅଭିଯୁକ୍ତକୁ ପୋଲିସ ଗିରଫ କରିଛି ।
