ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଆଜି (ବୁଧବାର) ବାୟୁସେନା କମାଣ୍ଡର ସମ୍ମିଳନୀରେ ଯୋଗ ଦେଇଛନ୍ତି । ଏହି ଅବସରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଲଦାଖରେ ବାୟୁସେନାର ଭୂମିକାକୁ ପ୍ରଶଂସା କରିବା ସହ କହିଛନ୍ତି ଯେ ଆମକୁ ସତର୍କ ରହିବା ଆବଶ୍ୟକ । ଯଦି ଭାରତ ଓ ଚୀନ ମଧ୍ୟରେ ଯୁଦ୍ଧର ପରିସ୍ଥିତି ଥାଏ ତେବେ ବାୟୁସେନାକୁ ସ୍ବଳ୍ପ ନୋଟିସରେ ସମସ୍ତ ପ୍ରସ୍ତୁତି କରିବାକୁ ପଡିବ ।
ବାୟୁସେନା କମାଣ୍ଡର ସମ୍ମିଳନୀର ଉଦଘାଟନୀ ଅଧିବେଶନକୁ ସମ୍ବୋଧିତ କରିଛନ୍ତି ପ୍ରତିରକ୍ଷା ମନ୍ତ୍ରୀ । ଭାରତୀୟ ବାୟୁସେନାର ତତ୍ପରତା ଓ ସୀମା ସୁରକ୍ଷା ପାଇଁ ବାୟୁସେନା ଦ୍ବାରା ନିଆଯାଇଥିବା ପଦକ୍ଷେପକୁ ପ୍ରତିରକ୍ଷା ମନ୍ତ୍ରୀ ପ୍ରଶଂସା କରିଛନ୍ତି ।
ପ୍ରକାଶଥାଉକି, ଭାରତ ଓ ଚୀନ ମଧ୍ୟରେ ସୀମା ବିବାଦ ପାଇଁ ତିକ୍ତତା ମେ’ ମାସରୁ ଚାଲିଛି । ସେତେବେଳେ ଭାରତୀୟ ବାୟୁସେନା ଏହାର ଯୁଦ୍ଧ ବିମାନ ଓ ଆପାଚେ ଭଳି ହେଲିକପ୍ଟର ଏଲଏସିରେ ମୁତୟନ କରିଥିଲା । ଏହା ସହ ବାୟୁସେନା ଯବାନ ଓ ଅନ୍ୟାନ୍ୟ ଆବଶ୍ୟକୀୟ ଅସ୍ତ୍ରଶସ୍ତ୍ର ଏୟାରଲିଫ୍ଟ କରିଥିଲା ।
