ଥିରୁଅନନ୍ତପୁରମ: ନିର୍ବାଚନକୁ ନେଇ ପୂର୍ବତନ ଇସ୍ରୋ ଚେୟାରମ୍ୟାନ ଜି.ମାଧବନ ନାୟାରଙ୍କୁ ହତ୍ୟା ଧମକ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମର୍ଥନ କଲେ ତାଙ୍କୁ ହତ୍ୟା କରାଯିବ ବୋଲି ଧମକ ଦେଇଛନ୍ତି ଦୃର୍ବୁତ୍ତ । ଦୁଇ ଦିନ ତଳେ ଏକ ଚିଠି ଜରିଆରେ ଏହି ଧମକ ଦିଆଯାଇଥିବା ସୂଚନା ଦେଇଛନ୍ତି ମାଧବନ ।
ସୂଚନା ଅନୁଯାୟୀ ଖବର ପ୍ରଘଟ ହେବା ପରେ ମାଧବନଙ୍କ ସୁରକ୍ଷାକୁ ନେଇ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥାମାନ ଗ୍ରହଣ କରାଯାଇଛି । ଏଥିସହ ମାଧବନଙ୍କ ପାଖକୁ ଆସିଥିବା ଚିଠିଟି କିଏ ଏବଂ କେଉଁଠାରୁ ପଠାଇଛି ସେନେଇ ତଦନ୍ତ ମଧ୍ୟ ଆରମ୍ଭ ହୋଇଛି । ପ୍ରାଥମିକ ତଦନ୍ତରୁ ଜଣା ପଡିଛି କି ଚିଠିଟି ଜୈଶ-ଇ-ମହମ୍ମଦରଆତଙ୍କୀ ସଙ୍ଗଠନଦ୍ବାରା ପଠାଯାଇଥିଲା ।
ତେଣୁ ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ ଫରେନସିକ ଯାଞ୍ଚ ଆରମ୍ଭ ହୋଇଥିବା ସୂଚନା ଦେଇଛି କେରଳ ପୋଲିସ । ଏନେଇ ଏକ ମାମଲା ରୁଜୁ ହୋଇଥିବା ମଧ୍ୟ ପୋଲିସ କହିଛି । ତେବେ 75 ବର୍ଷୀୟ ନାୟାର 2009 ମସିହାରେ ଇଣ୍ଡିଆନ୍ ସ୍ପେଶ ରିସର୍ଚ୍ଚ ଅର୍ଗାନାଇଜେସନ୍ (ଇସ୍ରୋ)ରୁ ଚେୟାରମ୍ୟାନ ଭାବେ ଅବସର ନେଇଥିଲେ ।
ବିଜ୍ଞାନ କ୍ଷେତ୍ରରେ ଉଲ୍ଲେଖନୀୟ ଅବଦାନ ଯୋଗୁଁ ନାୟାରଙ୍କୁ ପଦ୍ମ ଭୂଷଣ ଓ ପଦ୍ମ ବିଭୂଷଣ ଉପାଧିରେ ସମ୍ମାନିତ କରାଯାଇଛି । ତାଙ୍କର ସବୁଠାରୁ ଗୁରୁତ୍ତ୍ବପୂର୍ଣ୍ଣ ଅବଦାନ ମଧ୍ୟରେ ରହିଛି କ୍ରାୟୋଜେନିକ ଇଞ୍ଜିନ ଜିଏସ୍ଏଲ୍ଭିର ଡିଜାଇନ୍ ଓ ଡେଭେଲପମେଣ୍ଟ । 2018 ମସିହାରେ ସେ ବିଧିବଦ୍ଧ ଭାବେ ବିଜେପିରେ ଯୋଗ ଦେଇଥିଲେ ।
