ନୂଆଦିଲ୍ଲୀ: ଫାଇନାନ୍ସିଆଲ ଆକ୍ସନ ଟାସ୍କଫୋର୍ସ (ଏଫଏଟିଏଫ)ର ଧୂଷର ତାଲିକାରୁ ବାହାରିବା ପାଇଁ ପାକିସ୍ତାନ ଅଣ୍ଟା ଭିଡିଛି । ଏହାକୁ ଦୃଷ୍ଟିରେ ରଖି ସେ ଆତଙ୍କବାଦୀ ସଂଗଠନଗୁଡ଼ିକ ବିରୁଦ୍ଧରେ କେତେକ ପଦକ୍ଷେପ ନେଇଛି । ଇମ୍ରାନ ସରକାର ୮୮ଟି ନିଷିଦ୍ଧ ଆତଙ୍କବାଦୀ ସଂଗଠନଙ୍କ ବିରୁଦ୍ଧରେ କଡ଼ା ପଦକ୍ଷେପ ନେଇ ସେମାନଙ୍କ ଆର୍ଥିକ କାରବାରକୁ ଓ ପାଣ୍ଠି ସଂଗ୍ରହ ଉପରେ ନିଷେଧାଦେଶ ଲଗାଇଛନ୍ତି । ଏହା ବ୍ୟତୀତ ସରକାର ସେମାନଙ୍କ ସମ୍ପତ୍ତି ଜବତ କରିଛନ୍ତି । ଏହି ତାଲିକାରେ ଭାରତର ମୋଷ୍ଟ ୱାଣ୍ଟେଡ୍ ଦାଉଦ୍ ଇବ୍ରାହିମର ନାମ ରହିଛି । ତେବେ ଅଣ୍ଡରୱାର୍ଲ୍ଡ ଡନ୍ ଦାଉଦ ଇବ୍ରାହିମ ପାକିସ୍ତାନର ଛତ୍ରଛାୟାରେ ଥିବା ପାକିସ୍ତାନ ସ୍ବୀକାର କରିଛି ।
ଗତ ୧୮ ତାରିଖରେ ପାକିସ୍ତାନ ସରକାର ଦୁଇଟି ବିଜ୍ଞପ୍ତି ଜାରି କରି ଏହି କଟକଣା ଲଗାଇଛନ୍ତି । ବିଜ୍ଞପ୍ତି ଅନୁଯାୟୀ, ଦାଉଦ ଇବ୍ରାହିମ କରାଚିରେ ଅଛି । ଏହି ତାଲିକାରେ ଇବ୍ରାହିମର ଠିକଣା କରାଚିର ହ୍ବାଇଟ ହାଉସ ଲେଖାଯାଇଛି । ଜାତିସଂଘ ତାଲିକା ପ୍ରକାଶ ପାଇବା ପରେ ପାକିସ୍ତାନ ଏହି ପ୍ରତିବନ୍ଧକ ଲଗାଇଛି। ଏହା ପରେ ପାକିସ୍ତାନ ସରକାର ଦାଉଦ ଇବ୍ରାହିମର ଆକାଉଣ୍ଟକୁ ସିଲ୍ କରିବା ସହିତ ତା ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ।
ତେବେ ଦାଉଦର ପାକିସ୍ତାନ ନାଗରିକତା ନମ୍ବର ଅଛି । ତାର ଜାତୀୟ ପରିଚୟ ସଂଖ୍ୟା ହେଉଛି KC-285901 । ତାର ସମ୍ପୂର୍ଣ୍ଣ ଠିକଣା ହେଉଛି: ହ୍ବାଇଟ ହାଉସ୍, ହାଉସ୍ ନମ୍ବର 37, ରୋଡ୍ ନମ୍ବର 30, ପ୍ରତିରକ୍ଷା ହାଉସିଂ ଅଥରିଟି, କରାଚି ପାକିସ୍ଥାନ । ତାଲିକା ଅନୁଯାୟୀ, ଦାଉଦର ଭାରତୀୟ ପାସପୋର୍ଟ ନମ୍ବର ହେଉଛି A-333602, ଯାହା ମୁମ୍ବାଇରୁ 4 ଜୁନ୍ 1985 ରେ ଜାରି କରାଯାଇଥିଲା । ଏହା ବ୍ୟତୀତ ତାର ଅନେକ ପାସପୋର୍ଟ ମଧ୍ୟ ରହିଛି ।
ଅଗଷ୍ଟ 18 ରେ ପାକିସ୍ତାନ ସରକାର ଦୁଇଟି ବିଜ୍ଞପ୍ତି ଜାରି କରି ଜୈଶ-ଇ-ମହମ୍ମଦ ମୁଖ୍ୟ ଅଜହର ଏବଂ ଅଣ୍ଡରୱାର୍ଲ୍ଡ ଡନ୍ ଇବ୍ରାହିମ, 26/11 ମୁମ୍ବାଇ ଆକ୍ରମଣ ଷଡଯନ୍ତ୍ରକାରୀ ତଥା ଜମାତ-ଉଦ-ଦାୱର ମାଷ୍ଟରମାଇଣ୍ଡ ଉପରେ ପ୍ରତିବନ୍ଧକ ଘୋଷଣା କରିଥିଲେ । 1993 ମୁମ୍ବାଇ ବୋମା ବିସ୍ଫୋରଣ ପରେ ଇବ୍ରହିମ ଭାରତ ପାଇଁ ସବୁଠାରୁ ଅଧିକ ଆତଙ୍କବାଦୀ ଭାବରେ ଉଭା ହୋଇଥିଲା । ଅଣ୍ଡରୱାର୍ଲ୍ଡରେ ଦାଉଦ ଇବ୍ରାହିମର ଏକ ବିସ୍ତୃତ ଏବଂ ବେଆଇନ ବ୍ୟବସାୟ ରହିଛି ।
2011 ରେ, ଇଣ୍ଟରପୋଲ ରେଡ କର୍ଣ୍ଣର ନେଟିସ ଜାରି କରି କରାଚିରେ ଦାଉଦର ଦୁଇଟି ଠିକଣା ଉଲ୍ଲେଖ କରିଥିଲା । ସେଥିମଧ୍ୟରୁ ଗୋଟିଏ ହେଲା ହାଉସ୍ ନମ୍ବର 37, ଡିଫେନ୍ସ ହାଉସିଂ ଅଥରିଟି ଏବଂ ଅନ୍ୟଟି ହ୍ବାଇଟ ହାଉସ୍, କ୍ଲିଫଟନ୍ ରୋଡ୍ ଯାହା ସାଉଦି ମସଜିଦ ନିକଟରେ ଅଛି । ଉଭୟ ପରସ୍ପରଠାରୁ ପାଞ୍ଚ କିଲୋମିଟର ଦୂରରେ ଅଛି ।
ସୂଚନାଯୋଗ୍ୟ ଯେ, ପ୍ରତିଶ୍ରୁତି ମୁତାବକ ଆତଙ୍କବାଦୀଙ୍କୁ ପାଣ୍ଠିଯୋଗାଣ ବନ୍ଦ କରିବା ଦିଗରେ କୌଣସି ଆଖିଦୃଶିଆ ପଦକ୍ଷେପ ନେଉନଥିବାରୁ ପାକିସ୍ତାନ ଗତ ୨୦୧୮ରୁ ଏଫଏଟିଏଫର ଗ୍ରେ ତାଲିକାରେ ରହିଛି।
