ନୂଆଦିଲ୍ଲୀ: ମାଡି ଆସୁଛି ବାତ୍ୟା 'ଅମ୍ଫାନ' । ସାମୁଦ୍ରିକ ଘୂର୍ଣ୍ଣିବଳୟ ଧିରେ ଧିରେ ତୀବ୍ରତର ହୋଇ ସାମୁଦ୍ରିକ ଝଡର ରୂପ ନେଇଥିବା ବେଳେ ଏହା ଓଡିଶା ଓ ପଶ୍ଚିମବଙ୍ଗକୁ ପ୍ରଭାବିତ କରିବାର ସୂଚନା ରହିଛି । ସୋମବାର ସନ୍ଧ୍ୟା ସୁଦ୍ଧା ସୁପର ସାଇକ୍ଲୋନ ବା ମହାବାତ୍ୟାର ରୂପ ଧାରଣ କରିସାରିଛି । ବୁଧବାର ଏହା ଲ୍ୟାଣ୍ଡଫଲ କରିବା ନେଇ ଅନୁମାନ କରାଯାଉଥିବା ବେଳେ ଲ୍ୟାଣ୍ଡଫଲ ସମୟରେ ପବନର ବେଗ ଘଣ୍ଟାପ୍ରତି 185 କିଲୋମିଟର ରହିବା ନେଇ ଅନୁମାନ କରାଯାଉଛି ।
ବାତ୍ୟା ପରିସ୍ଥିତିର ମୁକାବିଲା ପାଇଁ ବର୍ତ୍ତମାନ ଓଡିଶା ଓ ପଶ୍ଚିମବଙ୍ଗରେ ପ୍ରସ୍ତୁତି ଜୋରଦାର ଚାଲିଛି । ତେବେ କିପରି ଚାଲିଛି ପ୍ରସ୍ତୁତି ଓ କ’ଣ ରହିଛି ବାତ୍ୟାରୁ ବଞ୍ଚିବା ପାଇଁ ଗାଇଡଲାଇନ, ପଢନ୍ତୁ ...
ବାତ୍ୟାର ସ୍ଥିତି ଦେଖି ପାଣିପାଗ ବିଭାଗ ଓଡିଶା ଓ ପଶ୍ଚିମବଙ୍ଗରେ ପ୍ରବଳ ବର୍ଷା ହେବା ନେଇ ପୂର୍ବାନୁମାନ କରିବା ସହ ସତର୍କ ସୂଚନା ଜାରି କରିଛି । ଏଥିସହ ଉପ-ହିମାଳୟ ପଶ୍ଚିମବଙ୍ଗ, ସିକିମ, ଆସାମ ଓ ମେଘାଳୟରେ ମେ 21 ଯାଏଁ ବାତ୍ୟାର ପ୍ରଭାବରେ ବର୍ଷା ହେବା ନେଇ ସତର୍କ ସୂଚନା ଜାରି ହୋଇଛି ।
ତେବେ ପାଣିପାଗ ବିଭାଗର ସୂଚନା ମୁତାବକ ବାତ୍ୟା ‘ଅମ୍ଫାନ’ ପଶ୍ଚିମବଙ୍ଗ-ବାଂଲାଦେଶ ମଧ୍ୟ ଦେଇ ଅତିକ୍ରମ କରିବ । ପଶ୍ଚିମବଙ୍ଗର ସାଗର ଦ୍ବୀପ ଓ ବାଂଲାଦେଶର ହାଥିଆ ଦ୍ବୀପରେ ଏହାର ପ୍ରଭାବ ବୁଧବାର ସନ୍ଧ୍ୟା ସୁଦ୍ଧା ଦେଖିବାକୁ ମିଳିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ