ନୂଆଦିଲ୍ଲୀ: କୋରୋନା ଭାଇରସରେ ସର୍ବାଧିକ ପ୍ରଭାବିତ ହୋଇଥିବା ବିଶ୍ବର ଦ୍ବିତୀୟ ଦେଶ ପାଲଟିଛି ଇରାନ । ସେଠାରେ କୋରୋନା ଭାଇରସ ସଂକ୍ରମଣ ଜନିତ ମୃତ୍ୟୁସଂଖ୍ୟା 90 ଟପିଲାଣି । ସେପଟେ ଇରାନରେ କରୋନା ଭାଇରସରେ ପ୍ରଭାବିତ ସହରରେ ଫସି ରହିଛନ୍ତି କେତେକ ଭାରତୀୟ । ସେମାନଙ୍କୁ ଉଦ୍ଧାର କରିବା ପାଇଁ ଭାରତ ସରକାର ଇରାନ ଅଧିକାରୀଙ୍କ ସହ ମିଶି କାର୍ଯ୍ୟ କରୁଥିବା ଗୁରୁବାର ବୈଦେଶିକ ମନ୍ତ୍ରୀ ଏସ ଜୟଶଙ୍କର ସୂଚନା ଦେଇଛନ୍ତି ।
ଏନେଇ ଜୟଶଙ୍କର ଟ୍ବିଟ କରି କହିଛନ୍ତି, 'ଇରାନରେ ଫସିରହିଥିବା ଭାରତୀୟଙ୍କୁ ସ୍ବଦେଶ ଫେରାଇ ଆଣିବା ପାଇଁ ବ୍ୟବସ୍ଥା କରାଯାଉଛି । ସେମାନଙ୍କର ସ୍ବାସ୍ଥ୍ୟ ପରୀକ୍ଷା ପାଇଁ ଗୁରୁବାର ଭାରତୀୟ ମେଡିକାଲ ଟିମ୍ ଇରାନ ପହଞ୍ଚିଛନ୍ତି । ଆଜି ସନ୍ଧ୍ୟା ସୁଦ୍ଧା କ୍ବୋମରେ ପ୍ରଥମ କ୍ଲିନିକ ସ୍ଥାପିତ ହେବ ବୋଲି ଆଶା ରଖାଯାଇଛି । ଏହାପରେ ତୁରନ୍ତ ସେମାନଙ୍କର ସ୍ବାସ୍ଥ୍ୟ ପରୀକ୍ଷା କରାଯିବ । କୋରୋନା ଭାଇରସରେ ସଂକ୍ରମିତ ନଥିବା ଭାରତୀୟଙ୍କୁ ଫେରାଇ ଆଣିବା ପାଇଁ ଇରାନ ଅଧିକାରୀଙ୍କ ସହ ମିଳିତ ଭାବରେ କାର୍ଯ୍ୟ କରାଯାଉଛି ।'
ଏହା ସହିତ ଜୟଶଙ୍କର ସେମାନଙ୍କ ପରିବାରକୁ ସରକାରଙ୍କ ଉପରେ ବିଶ୍ବାସ ବଜାୟ ରଖିବାକୁ ଅନୁରୋଧ କରିଛନ୍ତି । ସେ କହିଛନ୍ତି, ମନ୍ତ୍ରୀମାନଙ୍କର ଏକ ଟିମ୍ ଲଗାତାର ଏହି ପ୍ରକ୍ରିୟା ଉପରେ ନଜର ରଖିଛନ୍ତି । ପରିବାରର ଦୁଃଖକୁ ବୁଝିପାରୁଥିବା କହିଛନ୍ତି ଜୟଶଙ୍କର ।
@ANI
