ନୂଆଦିଲ୍ଲୀ: ଚୀନ ସମେତ ବିଶ୍ବର ଅନେକ ଦେଶରେ କୋରୋନା ଭାଇରସରେ ସଂକ୍ରମିତ ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ଏନେଇ ଭାରତକୁ ଆଶ୍ବସ୍ତି ମିଳିଛି । ଭାଇରସରେ ଆକ୍ରାନ୍ତ ଥିବା କେରଳର 3 ଜଣ ରୋଗୀଙ୍କ ମଧ୍ୟରୁ 2 ଜଣ ସଂକ୍ରମଣ ମୁକ୍ତ ହୋଇଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି ।
ସୂଚନା ମୁତାବକ, ଚୀନରୁ ଫେରିଥିବା କେରଳର 3 ଜଣ ବ୍ୟକ୍ତି କୋରୋନା ଭାଇରସରେ ଆକ୍ରାନ୍ତ ଥିଲେ । ସେମାନଙ୍କୁ କେରଳର ଭିନ୍ନ ଭିନ୍ନ ଡାକ୍ତରଖାନାର ଆଇସୋଲେଶନ ୱାର୍ଡରେ ରଖି କରି ଚିକିତ୍ସା କରାଯାଉଥିଲା । ତେବେ ପୂର୍ବରୁ ଜଣଙ୍କର ସ୍ବାସ୍ଥ୍ୟବସ୍ଥାରେ ସୁଧାର ଆସିଥିବାରୁ ତାଙ୍କୁ ଡିସଚାର୍ଜ କରିଦିଆଯାଇଥିଲା । ସୋମବାର ଦ୍ବିତୀୟ ରୋଗୀଙ୍କର ସ୍ବାସ୍ଥ୍ୟବସ୍ଥାରେ ସୁଧାର ଆସିବା ପରେ ତାଙ୍କୁ ମଧ୍ୟ ହସ୍ପିଟାଲରୁ ଡିସ୍ଚାର୍ଜ କରିଦିଆଯାଇଛି । ଅନ୍ୟପକ୍ଷରେ ତୃତୀୟ ରୋଗୀ ଏବେ ମଧ୍ୟ ଡାକ୍ତରଖାନାରେ ଚିକିତ୍ସାଧୀନ ରହିଛନ୍ତି ।
ସୂଚନାଯୋଗ୍ୟ ଯେ, ଚୀନରେ କୋରୋନା ଭାଇରସ ଜନିତ ମୃତ୍ୟୁ ସଂଖ୍ୟା ରବିବାର 1765କୁ ପହଞ୍ଚିଛି । ସେପଟେ ଆକ୍ରାନ୍ତ ସଂଖ୍ୟା 67 ହଜାରରେ ପହଞ୍ଚିଛି ।
@ANI
