ନୂଆଦିଲ୍ଲୀ: ରବିବାର ଠାରୁ ଦୁନିଆର ସର୍ବବୃହତ ସର୍ଦ୍ଦାର ବଲ୍ଲଭ ଭାଇ ପଟେଲ କୋଭିଡ ହସ୍ପିଟାଲ କୋରୋନା ଆକ୍ରାନ୍ତଙ୍କ ଆଡମିଶନ ଆରମ୍ଭ ହୋଇଛି। ବର୍ତ୍ତମାନ ଏଠାରେ 2000 ବିଶିଷ୍ଟ ଶଯ୍ୟାରେ କାର୍ଯ୍ୟ ଆରମ୍ଭ ହେବ । ଏନେଇ ରବିବାର ସକାଳୁ ସକାଳୁ ଉକ୍ତ କେୟାର ସେଣ୍ଟର ପରିଦର୍ଶନ କରିଛନ୍ତି ଦିଲ୍ଲୀ ଉପରାଜ୍ୟପାଳ ଅନିଲ ବୈଜଲ ।
ତେବେ ଦିଲ୍ଲୀର ଭାଟି ମାଇନ୍ସ ଅଞ୍ଚଳରେ ଥିବା ରାଧା ସ୍ବାମୀ ସତସଙ୍ଗ ବ୍ୟାସ କେନ୍ଦ୍ରକୁ ବର୍ତ୍ତମାନ 10000 ଶଯ୍ୟା ବିଶିଷ୍ଟ ସର୍ଦ୍ଦାର ବଲ୍ଲଭ ଭାଇ ପଟେଲ କୋଭିଡ କେୟାର ସେଣ୍ଟରରେ ପରିବର୍ତ୍ତନ କରାଯାଇଛି । ଏହି ସତସଙ୍ଗ କେନ୍ଦ୍ର ବର୍ତ୍ତମାନ ଏକ ନୂଆ ନାଁ ସହିତ କାର୍ଯ୍ୟକ୍ଷମ ହେବ । ଆଜି ଜୁଲାଇ 5 ତାରିଖରୁ ସଂକ୍ରମିତ ମାନେ ଏଠାରେ ଆଇସୋଲେସନରେ ରହିବେ ।
ଯଦି କୋରୋନା ଆକ୍ରାନ୍ତ ମାନଙ୍କୁ ଶ୍ୱାସକ୍ରିୟାରେ ଅସୁବିଧାର ହୁଏ, ତେବେ ସର୍ଦ୍ଦାର ପଟେଲ କୋଭିଡ କେୟାର ସେଣ୍ଟରରେ 10 ପ୍ରତିଶତ ଶଯ୍ୟାରେ ଅମ୍ଳଜାନ ସୁବିଧା ମଧ୍ୟ ଉପଲବ୍ଧ ରହିଛି । ଏହି ହସ୍ପିଟାଲରରେ ଭର୍ତ୍ତି ହେବା ଠାରୁ ଡିସଚାର୍ଜ ହେବା ପର୍ଯ୍ୟନ୍ତ ସମସ୍ତ ପ୍ରକ୍ରିୟା ଇଲେକ୍ଟ୍ରୋନିକ ଅଟେ । ଆକ୍ରାନ୍ତ ମାନଙ୍କୁ ଯାଞ୍ଚ କରିବା ପାଇଁ ନର୍ସମାନେ ମଧ୍ୟ ଉପସ୍ଥିତ ରହିବେ।
ହସ୍ପିଟାଲରେ ଏହି 2000 ଶଯ୍ୟା ITBP ପକ୍ଷରୁ ଆୟୋଜନ କରାଯଆଇଛି । ଆଇଟିବିପି ନିଜର170 ଡାକ୍ତର, ବିଶେଷଜ୍ଞ ଏବଂ 700ରୁ ଅଧିକ ନର୍ସ ଏବଂ ପାରାମେଡିକ୍ସ ସହିତ କାର୍ଯ୍ୟ କରୁଛି । ଏଠାରେ ଉପସ୍ଥିତ ଥିବା ଅଧିକାଂଶ ମୌଳିକ ଜିନିଷ ଯେପରିକି ଶଯ୍ୟା, ଗଦି ଇତ୍ୟାଦି ବିଭିନ୍ନ ସାମାଜିକ ସଂଗଠନ ଏବଂ ବେସରକାରୀ ସଂଗଠନ ମାଧ୍ୟମରେ ଦାନ କରାଯାଇଛି ।
ତେବେ DRDO ନିର୍ମିତ ଏହି କୋଭିଡ ହସ୍ପିଟାଲର 11 ଦିନ ମଧ୍ୟରେ ଅସ୍ଥାୟୀ ହସ୍ପିଟାଲ ଭାବେ ପ୍ରସ୍ତୁତ କରାଯାଇଛି । ଏଠାରେ 250ଟି ଆଇସିୟୁ ବେଡ ରହିବ । ଏନେଇ ସୂଚନା ଦେଇଛନ୍ତି DRDO ଅଧିକାରୀ ।
