ପାଟନା:ନାଗରିକତା ସଂଶୋଧନ ଆଇନ(ସିଏଏ)କୁ ନେଇ ଦେଶବ୍ୟାପୀ ବିରୋଧ ଜାରି ରହିଛି। ଏନେଇ ବିହାରରେ ଜନ ଅଧିକାରୀ ପାର୍ଟି ମୁଖ୍ୟ ତଥା ପୂର୍ବତନ ସାଂସଦ ପପୁ ଯାଦବ କହ୍ନେୟା କୁମାରଙ୍କ ଷ୍ଟାଇଲରେ ଆଜାଦି ନାରା ଲଗାଇବା ସହ ୟୁପି ସିଏମ ଯୋଗୀ ଆଦିତ୍ୟନାଥଙ୍କୁ ନେଇ ବିବାଦୀୟ ବୟାନ ଦେଇଛନ୍ତି। ଇଚ୍ଛା ହେଉଛି ଯୋଗୀଙ୍କ ଛାତି ଫଟେଇ ଦେବାକୁ ବୋଲି କହିଛନ୍ତି ସେ ।
ସିଏଏ, ଏନଆରସି ଓ ଏନପିଆର ବିରୋଧରେ ବିହାର ସମସ୍ତିପୁର ଠାରେ 10 ଜାନୁଆରୀ ଠାରୁ ଅନିଶ୍ଚିତତାକାଳ ପାଇଁ ସତ୍ୟାଗ୍ରହରେ ସାମିଲ ହୋଇଛନ୍ତି ସେଠାକାର ପୂର୍ବତନ ସାଂସଦ ପପୁ ଯାଦବ। ଏନେଇ ଆୟୋଜିତ ହୋଇଥିବା ସଭାକୁ ସମ୍ବୋଧିତ କରି ସେ ୟୁପି ସିଏମ ଯୋଗୀଙ୍କୁ ଟାର୍ଗେଟ କରିଛନ୍ତି। ମୁଖ୍ୟମନ୍ତ୍ରୀ ଯୋଗୀ ସମ୍ବିଧାନର ଶପଥ ନେଲା ପରେ ମଧ୍ୟ ସଂଖ୍ୟାଲଘୁଙ୍କୁ ନିର୍ଯ୍ୟାତିତ କରୁଛନ୍ତି। ଏଭଳି କାମ କରୁଥିବା ସିଏମଙ୍କ ଦମ୍ଭ ଭାଙ୍ଗି ଦେବାକୁ ଇଚ୍ଛା ହେଉଛି ବୋଲି ସେ କହିଛନ୍ତି।
ସେ ଆହୁରି କହିଛନ୍ତି ଯେ, ଦେଶରେ ଅତ୍ୟାଚାରର କୌଣସି ସ୍ଥାନ ନାହିଁ । ବର୍ତ୍ତମାନ ଜେଏନୟୁ, ଜାମିଆମିଲିୟାରେ ଛାତ୍ରଙ୍କ ଉପରେ ସହଜରେ ଆକ୍ରମଣ କରାଯାଉଛି । ମାତ୍ର ଆଶ୍ଚର୍ଯ୍ୟର ବିଷୟ ଯେ ବିହାର ମୁଖ୍ୟମନ୍ତ୍ରୀ ନୀତିଶ ଓ ଲାଲୁ ଯାଦବଙ୍କ ଭଳି ବିହାର ବରିଷ୍ଠ ନେତା ବିହାରୀ ଛାତ୍ରଙ୍କୁ ସମର୍ଥନ କରିନାହାଁନ୍ତି। ବିହାରୀ କହିବା ପାଇଁ ଦୁଃଖ ଓ ଲାଜ ଲାଗୁଥିବା କହିଛନ୍ତି ସେ।
3 ଦିନ ଧରି ଏହି ସତ୍ୟାଗ୍ରହ ସଭାରେ ଅନେକ ସଂଖ୍ୟାରେ ସ୍ଥାନୀୟ ଲୋକେ ଓ ଯୁବକ ସାମିଲ ରହିଛନ୍ତି । ସତ୍ୟାଗ୍ରହ କରୁଥିବା ଲୋକଙ୍କ ମନୋବଳ ବୃଦ୍ଧି କରାଇବା ସହ ଆନ୍ଦୋଳନରେ ଦୃଢମନା ହୋଇ ରହିବା ପାଇଁ କହିଛନ୍ତି ପପୁ।
