ଥିରୁଅନନ୍ତପୁରମ: ନାଗରିକତା ସଂଶୋଧନ ଆଇନକୁ ନେଇ ସାରା ଦେଶରେ ବିରୋଧର ସ୍ଥିତି । ସରକାର ଓ ବିରୋଧୀ ଉଭୟଙ୍କ ମଧ୍ୟରେ ସାମ୍ନାସାମ୍ନି ପରିସ୍ଥିତି ଉପୁଜୁଥିବା ଦେଖିବାକୁ ମିଳୁଛି । ଅନେକ କଂଗ୍ରେସ ଶାସିତ ରାଜ୍ୟ ଏହି ଆଇନକୁ ଲାଗୁ ନକରିବା ନେଇ ସରକାରଙ୍କୁ ଚେତାବନୀ ମଧ୍ୟ ଦେଉଛନ୍ତି । ଏପରି ସମୟରେ ସିଏଏକୁ ନେଇ ବଡ ବୟାନ ଦେଇଛନ୍ତି କଂଗ୍ରେସର ବରିଷ୍ଠ ନେତା କପିଲ ସିବ୍ବଲ । ସିଏଏକୁ ଲାଗୁ ନକରିବା ଅସାମ୍ବିଧାନିକ ହେବ ବୋଲି ନିଜେ ମାନିଛନ୍ତି କପିଲ ।
କେରଳର ଲିଟରେଚର ଫେଷ୍ଟିଭାଲରେ ଯୋଗଦେଇ କଂଗ୍ରେସ ନେତା ସିବ୍ବଲ କହିଛନ୍ତି ଯେ ସିଏଏ ସଂସଦରୁ ପାରିତ ହୋଇଛି । ତେଣୁ କୌଣସି ବି ରାଜ୍ୟ ଏହି ଆଇନ ଲାଗୁ କରିବାକୁ ମନା କରିପାରିବେ ନାହିଁ । ଆଇନକୁ ଲାଗୁ କରିବାକୁ ମନା କରିବା ଅସାମ୍ବିଧାନିକ ବୋଲି ମତ ଦେଇଛନ୍ତି ସିବ୍ବଲ । ପୂର୍ବରୁ କେରଳ ଓ ପଞ୍ଜାବର କ୍ଷମତାସୀନ କଂଗ୍ରେସ ସରକାର ନାଗରିକତା ସଂଶୋଧନ ଆଇନ ଲାଗୁ ନକରିବା ନେଇ ସରକାରଙ୍କୁ ଚେତାବନୀ ଦେଇଥିଲେ ।
