ଗାନ୍ଧୀନଗର: ପ୍ରବଳ ବର୍ଷାରେ ଗୁଜୁରାଟର ଭଦୋଦରରା ବନ୍ୟା ଭଳି ପରିସ୍ଥିତି ଦେଖିବାକୁ ମିଳିଛି । ଯାହା ଫଳରେ ସାଧାରଣ ଜୀବନଯାତ୍ରା ବାଧାପ୍ରାପ୍ତ ହୋଇଛି। ଏହା ଯୋଗୁଁ ପ୍ରଭାବିତ ହୋଇଥିବା ଲୋକଙ୍କୁ ଉଦ୍ଧାର କରିବାକୁ ଏନଡିଆରଏଫ ଟିମ ମୁତୟନ କରାଯାଇଛି ।
ରାଜ୍ୟରେ ଦେଖା ଦେଇଥିବା ବନ୍ୟା ପରିସ୍ଥିତିର ମୁକୁବିଲା ପାଇଁ ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି । ଯେଉଁଠି ସେ ସ୍ଥାନୀୟ ପ୍ରଶାସନ ସହ ମିଶି ସ୍ଥିତି ସୁଧାରିବା ପାଇଁ 2 ଜଣ ପ୍ରଶାସନିକ ଅଧିକାରୀଙ୍କୁ ଦାୟିତ୍ୱ ପ୍ରଦାନ କରିଛନ୍ତି।
ଆଜି ଗୁଜୁରାଟର ସମସ୍ତ ସ୍କୁଲ ଓ କଲେଜ ବନ୍ଦ ହେବା ନେଇ ସୂଚନା ମିଳିଛି । ଜଳବନ୍ଦୀ ଯୋଗୁଁ 22ଟି ଟ୍ରେନ ବାତିଲ୍ କରାଯିବା ସହ ଅହମ୍ମଦାବାଦରୁ 2ଟି ବିମାନର ଗତିପଥ ବଦଳା ଯାଇଛି । ତଳିଆ ଅଞ୍ଚଳରୁ ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ଅହମ୍ମଦାବାଦ ଓ କେନ୍ଦ୍ରୀୟ ଗୁଜୁରାଟରେ ମଧ୍ୟ ବନ୍ୟା ପରିସ୍ଥିତି ସୃଷ୍ଟି ହୋଇଥିବା ଜଣାପଡିଛି। ଗୁଜୁରାଟର ସୌରାଷ୍ଟ୍ର ଓ ଅନ୍ୟାନ୍ୟ ସ୍ଥାନରେ ଆଗାମୀ 2 ଦିନରେ ପ୍ରବଳରୁ ଅତି ପ୍ରବଳ ବର୍ଷା ହେବା ନେଇ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି ।
