ବେଙ୍ଗାଲୁରୁ: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ କୁମାରସ୍ବାମୀଙ୍କ ସମେତ ରାଜ୍ୟର ଉପମୁଖ୍ୟମନ୍ତ୍ରୀ ଜି.ପରମେଶ୍ବର, ପୂର୍ବତନ ମନ୍ତ୍ରୀ ଡିକେ ଶିବକୁମାର, ଦିନେଶ ଗୁଣ୍ଡୁ ରାଓ ଏବଂ ବେଙ୍ଗାଲୁରୁର ପୂର୍ବତନ ପୋଲିସ କମିଶନରଙ୍କ ବିରୋଧରେ ମାନହାନୀ ଏବଂ ଦେଶଦ୍ରୋହ ମାମଲା ରୁଜୁ ହୋଇଛି ।
କର୍ଣ୍ଣାଟକର ତୁକମୁରର ସମାଜସେବୀ ମଲିକାର୍ଜୁନ ନାମକ ଜଣେ ବ୍ୟକ୍ତିଙ୍କ ଅଭିଯୋଗ କ୍ରମେ ବେଙ୍ଗାଲୁରୁ ପୋଲିସ ଏ ମାମଲା ରୁଜୁ କରିଛି। ଆଇପିସିର ଧାରା 20 ଅଧିନରେ ସେମାନଙ୍କ ବିରୋଧରେ ମାମଲା ରୁଜୁ ହୋଇଛି।
ମଲିକାର୍ଜୁନଙ୍କ ଅଭିଯୋଗ ଅନୁସାରେ, ତତ୍କାଳୀନ ମୁଖ୍ୟମନ୍ତ୍ରୀ କୁମାରସ୍ବାମୀ ଜେଡିଏସ ଏବଂ କଂଗ୍ରେସ ନେତାଙ୍କ ଘରେ ହୋଇଥିବା ଆୟକର ବିଭାଗର ଚଢାଉକୁ ବିରୋଧ କରିଥିଲେ । ଫଳରେ ଆୟକର ଅଧିକାରୀ ଠିକ ଭାବରେ ନିଜ କର୍ତ୍ତବ୍ୟ ନିର୍ବାହ କରି ପାରିନଥିଲେ। ସେତେବେଳେ ଏହାର ପ୍ରତିବାଦ କରିବା ସହ ବିକ୍ଷୋଭ ପ୍ରଦର୍ଶନ କରିଥିଲେ ଉଭୟ ଜେଡିଏସ ଏବଂ କଂଗ୍ରେସ କର୍ମୀ । ଏହା ସହିତ ବିକ୍ଷୋଭସ୍ଥଳରେ ଉପସ୍ଥିତ ପୋଲିସକର୍ମୀ ଏ ଦିଗରେ କୌଣସି ପଦକ୍ଷେପ ଗ୍ରହଣ କରିନଥିଲେ । ନିମ୍ନ ଅଦାଲତଙ୍କ ନିର୍ଦ୍ଦେଶ କ୍ରମେ ପୋଲିସ ଏହି ମାମଲା ରୁଜୁ କରିଛି।
