ରାଞ୍ଚି: ଟାଟା ଷ୍ଟିଲ କର୍ମଚାରୀଙ୍କ ପାଇଁ ଖୁସି ଖବର । ଚଳିତ ବର୍ଷ କମ୍ପାନୀ ପକ୍ଷରୁ ମିଳିବ ବମ୍ପର ବୋନସ । କମ୍ପାନୀ ଚଳିତ ବର୍ଷ ପାଖାପାଖି 240 କୋଟି ଟଙ୍କାର ବୋନସ ଦେବ ବୋଲି ନିଷ୍ପତ୍ତି ନେଇଛି । ଏହି ବୋନସ କମ୍ପାନୀର 13 ହଜାର 675 କର୍ମଚାରୀ ପାଇବେ ।
ମିଳିଥିବା ସୂଚନା ମୁତାବକ ଝାଡ଼ଖଣ୍ଡର ଜାମସେଦପୁରରେ ଥିବା ଟାଟାର ଷ୍ଟିଲ ପ୍ଲାଣ୍ଟ ତାର କର୍ମଚାରୀଙ୍କୁ ଏହି ବୋନସ ଦେବ । 2018-19 ବର୍ଷ ପାଇଁ ଏହି ବୋନସ ମିଳିବ । ଏନେଇ କମ୍ପାନୀ ପକ୍ଷରୁ ସୂଚନା ମିଳିଥିବା ବେଳେ ପ୍ଲାଣ୍ଟର ଏମଡ଼ି ଟିବି ନରେନ୍ଦ୍ରନ, ପ୍ରେସିଡେଣ୍ଟ ଆନନ୍ଦ ସେନ, ବିପି ଏଚଆରଏମ ସହିତ ଅନ୍ୟ ବରିଷ୍ଠ ଅଧିକାରୀ ମଧ୍ୟ ସ୍ବୀକୃତି ଦେଇଥିବା ଜଣାପଡ଼ିଛି ।
ଏହି କମ୍ପାନୀରେ ପାଖାପାଖି 13 ହଜାର 675 ଜଣ କର୍ମଚାରୀ ସମସ୍ତ ବିଭାଗରେ କାର୍ଯ୍ୟକରୁଥିବା ଜଣାପଡ଼ିଛି । ସେମାନଙ୍କ ପଦ ଓ ମାସିକ ଦରମା ଅନୁଯାୟୀ ସେମାନଙ୍କୁ ଏହି ବୋନସ ରାଶି ମିଳିବ । ତେବେ ସର୍ବନିମ୍ନ 34 ହଜାର 764 ଟଙ୍କା ମିଳିବାକୁ ଥିବାବେଳେ ସର୍ବାଧିକ 2ଲକ୍ଷ 68 ହଜାର 767 ଟଙ୍କା ମିଳିବ ବୋଲି ସୂଚନା ମିଳିଛି ।
ଏନେଇ ଟାଟା କାର୍ମିକ ସଙ୍ଗଠନର ଅଧ୍ୟକ୍ଷ ରବିପ୍ରସାଦ କହିଛନ୍ତି କି, କର୍ମଚାରୀ ୟୁନିଅନ ଏବଂ କମ୍ପାନୀ କର୍ମଚାରୀଙ୍କ ଭବିଷ୍ୟତ ପାଇଁ ଏହି ବୋନସ ନିଶ୍ଚିତ ପକ୍ଷେ ସହାୟକ ହେବ । କମ୍ପାନୀର ବରିଷ୍ଠ ଅଧିକାରୀଙ୍କ ସହିତ ଏହି ବୋନସ ନେଇ ଆଲୋଚନା ହୋଇଥିଲା । କମ୍ପାନୀ ଏହି ବୋନସ ଦେବାକୁ ରାଜି ହୋଇଥିଲା । ତେବେ ବୋନସ କର୍ମଚାରୀଙ୍କ ବ୍ୟାଙ୍କ ଆକାଉଣ୍ଟକୁ ପଠାଇ ଦିଆଯିବ ବୋଲି ସେ ସୂଚନା ଦେଇଛନ୍ତି ।
