ନୂଆଦିଲ୍ଲୀ: ଦିନ ଦୟାଲ ଉପାଧ୍ୟାୟ (ଡିଡିୟୁ) ମାର୍ଗ ସ୍ଥିତ ଭାରତୀୟ ଜନତା ପାର୍ଟି (ବିଜେପି) ମୁଖ୍ୟ କାର୍ଯ୍ୟାଳୟକୁ ବମ ଦ୍ବାରା ଉଡାଇ ଦେବାକୁ ଧମକ ଦିଆଯାଇଥିବା ଅଭିଯୋଗ ହୋଇଛି । ଖବର ପାଇ ପୋଲିସ ବିଜେପି ମୁଖ୍ୟାଳୟରେ ପହଞ୍ଚି ତନାଘନା ଆରମ୍ଭ କରିଛି । ଏନେଇ କାହାକୁ ଗିରଫ କରାଯାଇ ନଥିବା ବେଳେ ଏଭଳି କାଣ୍ଡ ଭିଆଇଥିବା ବ୍ୟକ୍ତି ମାନସୀକ ବିକାରଗ୍ରସ୍ତ ହୋଇଥାଇ ପାରେ ବୋଲି ପୋଲିସ ସନ୍ଦେହ କରୁଛି ।
ଆଜି (ଶନିବାର) ସକାଳ 11ଟା ସମୟରେ ବାରମ୍ବାର ବିଜେପି କାର୍ଯ୍ୟାଳୟକୁ ଫୋନ ଆସିଥିବା କହିଛନ୍ତି ଡିସିପି ମନଦୀପ ସିଂହ ରନ୍ଧାବ । ଡିସିପିଙ୍କ କହିବାନୁଯାୟୀ ଆସିଥିବା ଫୋନକୁ ଉଠାଇବା ପରେ କୌଣସି ଏକ ଅଜ୍ଞାତ ବ୍ୟକ୍ତି ଡିଡିୟୁ ମାର୍ଗରେ ଥିବା ବିଜେପି ମୁଖ୍ୟାଳୟକୁ ଉଡାଇ ଦେବାକୁ ଧମକ ଦେଉଥିଲା । ଏଭଳି ଶୁଣିବା ପରେ ଫୋନ ଉଠାଇଥିବା ବ୍ୟକ୍ତି ହଠାତ ଆଶ୍ଚର୍ଯ୍ୟ ହୋଇ ସଙ୍ଗେସଙ୍ଗେ ପୋଲିସକୁ ଖବର ଦେଇଥିଲେ ।
ଖବର ପାଇବା ପରେ ସଦଳବଳ ସହ ବିଜେପି ମୁଖ୍ୟାଳୟରେ ପହଞ୍ଚି ଛାନଭିନ ଆରମ୍ଭ କରିଥିଲେ ମଧ୍ୟ କୌଣସି ସନ୍ଦିଗ୍ଧକୁ ଧରିବାରେ ସକ୍ଷମ ହୋଇ ନାହିଁ ପୋଲିସ। କାର୍ଯ୍ୟାଳୟରେ ଲାଗିଥିବା ସମସ୍ତ ସିସିଟିଭି ଫୁଟେଜକୁ ଯାଞ୍ଚ କରାଯାଇଥିଲା । ସୁରକ୍ଷା ଦୃଷ୍ଟିରୁ କାର୍ଯ୍ୟାଳୟରେ 88ଟି ସିସିଟିଭି ଲଗାଯାଇଛି । କାର୍ଯ୍ୟାଳୟର ଭିତର ବାହାର ଠାରୁ ଆରମ୍ଭ ସଡକ ପର୍ଯ୍ୟନ୍ତ ସବୁକିଛି ସିସିଟିଭି ନଜରରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
