ପାଟନା: ଚନ୍ଦ୍ରରେ ଜାଗା କିଣିବା କଥା ଶୁଣିବାକୁ ମଜାଦାର ସହ ଆଶ୍ଚର୍ଯ୍ୟ ମଧ୍ୟ ଲାଗେ । ନିକଟରେ ବଲିଉଡର କିଙ୍ଗ ଖାନ ଶାହାରୁଖ ଖାନ ଶୁଶାନ୍ତ ସିଂହ ରାଜପୁତଙ୍କ ପାଇଁ ଚନ୍ଦ୍ରରେ ଜାଗା କିଣିଥିବା ଚର୍ଚ୍ଚା ହେଉଥିଲା । ତେବେ ବର୍ତ୍ତମାନ ବିହାର ବୋଧଗୟାର ଜଣେ ବ୍ୟକ୍ତି ଚନ୍ଦ୍ରରେ ଜାଗା କିଣିଥିବା ଦାବି କରୁଛନ୍ତି ।
ବୋଧଗୟା ନିବାସୀ ନୀରଜ କୁମାର ତାଙ୍କ ଜନ୍ମଦିନରେ ଚନ୍ଦ୍ରରେ ଏକ ଏକର ଜମି କିଣିଥିବା କହିଛନ୍ତି । ସେ ସବୁବେଳେ ଚନ୍ଦ୍ରକୁ ଯିବାକୁ ଚାହୁଁଥିଲେ କିନ୍ତୁ ଏହା ସମ୍ଭବ ହୋଇ ନ ଥିବାରୁ ସେ ସେଠାରେ ଜମି କିଣିବାକୁ ସ୍ଥିର କରିଥିଲେ। ଏଥିପାଇଁ ସେ ଦେଇଥିବା ରାଶି ଅଧିକ ନୁହେଁ, କିନ୍ତୁ ପ୍ରକ୍ରିୟା କଷ୍ଟସାଧ୍ୟ ଥିଲା ବୋଲି ନୀରଜ କୁମାର କହିଛନ୍ତି ।
ଏନେଇ ସେ କହିଛନ୍ତି, ଶାହରୁଖ ଖାନ ନିକଟରେ ମୃତ ଅଭିନେତା ସୁଶାନ୍ତ ସିଂ ରାଜପୁତଙ୍କ ପାଇଁ ଜମି କିଣିଥିବା ଚର୍ଚ୍ଚା ହେଉଥିଲା । ଏହାପରେ ମୁଁ ଏନେଇ ତଥ୍ୟ ସଂଗ୍ରହ କରିବା ଆରମ୍ଭ କରିଥିଲି। ମୁଁ ଅନଲାଇନ୍ ବିକ୍ରୟ ଏବଂ କ୍ରୟ ବିଷୟରେ ଜାଣିବାକୁ ପାଇଲି । ଆମେରିକାର ସୋସାଇଟି 'ଲୁନାର ସୋସାଇଟି ଇଣ୍ଟରନ୍ୟାସନାଲ' ଦ୍ୱାରା ଚନ୍ଦ୍ରରେ ଜମି ଅଛି ବୋଲି ଜାଣିବାକୁ ପାଇଥିଲି । ଏହାପରେ ପରେ ମୁଁ ଗୁଗୁଲ ମାଧ୍ୟମରେ ସୋସାଇଟି ସହ ଯୋଗାଯୋଗ କରିଥିଲି । 2019 ଅକ୍ଟୋବରରେ ଏକ ଏକର ଜମି ପାଇଁ ଆବେଦନ କରିଥିଲି ବୋଲି ନୀରଜ କୁମାର କହିଛନ୍ତି ।
ତେବେ ସେତେବେଳେ ସେ ପ୍ରାୟ 48,000 ଟଙ୍କା ଦେଇଥିଲେ । ତେବେ 2020 ଜୁଲାଇ 4 ରେ ତାଙ୍କର ଏହି ଜମି କିଣା କାର୍ଯ୍ୟ ସମାପ୍ତ ହୋଇଛି ବୋଲି ସେ ଜାଣିବାକୁ ପାଇଥିଲେ । ସୁଯୋଗ ମିଳିଲେ ମୁଁ ଚନ୍ଦ୍ରକୁ ଯିବାକୁ ଚାହିଁବି ବୋଲି କୁମାର କହିଛନ୍ତି ।
