ମୁମ୍ବାଇ: ଏନସିପି ମୁଖ୍ୟ ଶରଦ ପାୱାରଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇଛନ୍ତି ବିଜେପି ବିଧାୟକ ଗୋପିଚାନ୍ଦ ପାଦଲକର । ଶରଦ ପାୱାରଙ୍କୁ ସେ କୋରୋନା ଭାଇରସ ସହ ତୁଳନା କରିଛନ୍ତି । ତେବେ ତାଙ୍କର ଏହି ମନ୍ତବ୍ୟକୁ ନେଇ ବିଧାୟକଙ୍କ ଉପରେ ବର୍ଷିଛନ୍ତି ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାର ।
ପ୍ରତ୍ୟେକ ବ୍ୟକ୍ତି ନିଜର ମୂଲ୍ୟକୁ ଧ୍ୟାନରେ ରଖି ମନ୍ତବ୍ୟ ଦେବା ଉଚିତ୍। ଲୋକମାନେ ପରସ୍ପରକୁ ସମ୍ମାନ ଦେବା ଉଚିତ୍ । ଏହା ଆମର ସଂସ୍କୃତି ବୋଲି ଅଜିତ ପାୱାର କହିଛନ୍ତି । ମହାରାଷ୍ଟ୍ରର ପ୍ରଥମ ମୁଖ୍ୟମନ୍ତ୍ରୀ ସ୍ୱର୍ଗତ ଯଶବନ୍ତରାଓ ଚାଭାନ ଆମକୁ ଏହି ଶିକ୍ଷା ଦେଇଛନ୍ତି ଏବଂ ଆମେ ଏହାକୁ ପାଳନ କରିବା ଉଚିତ୍ ବୋଲି ଅଜିତ ପାୱାର କହିଛନ୍ତି ।
ସେ ଆହୁରି କହିଛନ୍ତି ଯେ, ପାଦଲକର ଅତୀତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଷୟରେ ମଧ୍ୟ ବିବାଦୀୟ ବୟାନ ଦେଇଥିଲେ ଯେତେବେଳେ ସେ ବିଜେପିରେ ସାମିଲ ନଥିଲେ । ତେବେ ପାଦଲକରଙ୍କୁ କଟାକ୍ଷ କରି ପାୱାର କହିଛନ୍ତି, କିଛି ଶସ୍ତା ଲୋକ ଭାବନ୍ତି ସେମାନେ ବଡ଼ ଲୋକଙ୍କ ବିରୋଧରେ ଆଲୋଚନା କରି ପ୍ରସିଦ୍ଧ ହେବେ ।
ସୂଚନାଯୋଗ୍ୟ ଯେ, ପାଦଲକର ଶରଦ ପାୱାରଙ୍କୁ କୋରୋନା ଭାଇରସ ସହ ତୂଳନା କରିଥିଲେ । ଶରଦ ପାୱାର କୋରୋନା ଭାଇରସ ଭଳି ମହାରାଷ୍ଟ୍ରକୁ ସଂକ୍ରମିତ କରୁଛନ୍ତି ବୋଲି ସେ କହିଥିଲେ ।
