ବେଙ୍ଗାଲୁରୁ: କେତେବେଳେ ସରିବ କର୍ଣ୍ଣାଟକ ନାଟକ ? ଗୁରୁବାର ସରିବାର ଥିଲା । ରାଜ୍ୟପାଳ ଏନେଇ ନିର୍ଦ୍ଦେଶ ମଧ୍ୟ ଦେଇଥିଲେ । ହେଲେ କଂଗ୍ରେସ-ଜେଡିଏସ ବିଧାୟକଙ୍କ ହଟ୍ଟଗୋଳ ପାଇଁ ଗୃହକୁ ଦିନକ ପାଇଁ ମୁଲତବୀ କରିଥିଲେ ବାଚସ୍ପତି । ଦିନକ ପାଇଁ ଘୁଞ୍ଚିଗଲା କୁମାରସ୍ବାମୀ ସରକାରର ଫ୍ଲୋର ଟେଷ୍ଟ । ବିଳମ୍ବକୁ ବିରୋଧ କରି ରାତିସାରା ବିଧାନସୌଧରେ ଧାରଣାରେ ବସିଲା ବିଜେପି । ବର୍ଷିଛନ୍ତି ଦଳର ବରିଷ୍ଠ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ସେଟ୍ଟର ।
ଜଗଦୀଶ କହିଛନ୍ତି, ଏବେ କୁମାରସ୍ବାମୀ ସରକାର(କଂଗ୍ରେସ-ଜେଡିଏସ ମେଣ୍ଟ) ପାଖରେ ବହୁମତ ନାହିଁ । ଯଦି ଅଛି ତେବେ ବିଳମ୍ବ କହିଁକି ? ବହୁମତ ପ୍ରମାଣ ଦେବାରେ ଜାଣିଶୁଣି ବିଳମ୍ବ କରାଯାଉଛି । ଗୃହରେ ଆସ୍ଥା ଭୋଟ ସମ୍ପର୍କରେ ଆଲୋଚନା ନକରି କଥା ବାଆଁରଉଛି କଂଗ୍ରେସ । ଏପରିକି ସମ୍ବିଧାନ ଏବଂ ସାମ୍ବିଧାନିକ କ୍ଷମତାର ଅଧିକାରୀଙ୍କୁ ଦଳ ଅବମାନନା କରୁଛି । ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ନେଇ ପ୍ରଶ୍ନ ଉଠାଉଛି । ରାଜ୍ୟପାଳଙ୍କ ନିର୍ଦ୍ଦେଶକୁ ଗୁରୁତ୍ବ ଦିଆଯାଉନାହିଁ ବୋଲି କହିଛନ୍ତି ଜଗଦୀଶ ।
ଏପଟେ ଆଜି ଦିନ 1.30 ସୁଦ୍ଧା ଫ୍ଲୋର ଟେଷ୍ଟ ଦେବେ କୁମାରସ୍ବାମୀ ସରକାର । ଏହି ଅବଧି ଭିତରେ ଯେମିତି ହେଲେ ବହୁମତ ପ୍ରମାଣ ଦେବାକୁ ନିର୍ଦ୍ଦେଶ ଦେଇଛନ୍ତି କର୍ଣ୍ଣାଟକ ରାଜ୍ୟପାଳ । କ’ଣ ହେବ କର୍ଣ୍ଣାଟକ ନାଟକର କ୍ଲାଇମେକ୍ସ, ଏହା ଉପରେ ରହିଛି ସଭିଙ୍କ ନଜର ।
