ନୂଆଦିଲ୍ଲୀ: ପରଲୋକରେ ସୁଷମା ସ୍ବରାଜ । ଆରମ୍ଭ ହୋଇଯାଇଛି ଶେଷଯାତ୍ରା । ଶେଷକୃତ୍ୟ ସମୟରେ ଲୁହରେ ଭିଜିଛି ଲୋଧି ରୋଡସ୍ଥିତ ଶ୍ମଶାନ । ସୁଷମାଙ୍କ ବିୟୋଗରେ ଅବାକ ପତି ସ୍ବରାଜ କୌଶଲ ଓ ଝିଅ ବାଂଶୁରୀ ସ୍ବରାଜ ।
ଶେଷ ଦର୍ଶନ କରିବାକୁ ପହଞ୍ଚିଥିବା ବିଜେପିର ବରିଷ୍ଠ ତଥା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ରେଳମନ୍ତ୍ରୀ ପିୟୁଷ ଗୋଏଲ, ରବିଶଙ୍କର ପ୍ରସାଦ ଓ ଜେପି ନଡ୍ଡା ସୁଷମାଙ୍କ ପାର୍ଥିବ ଶରୀରକୁ କାନ୍ଧ ଦେଇଛନ୍ତି ।
ଗତ ରାତିରେ(ମଙ୍ଗଳବାର) ହୃଦ୍ଘାତରେ ତାଙ୍କର ପରଲୋକ ହୋଇଥିଲା। ମୃତ୍ୟୁବେଳଙ୍କୁ ତାଙ୍କୁ 67 ବର୍ଷ ହୋଇଥିଲା। ସୁଷମାଙ୍କ ଆକସ୍ମିକ ମୃତ୍ୟୁ ସାରା ଦେଶକୁ କରିଛି ସ୍ତବ୍ଧ । ଯାହାକୁ ନେଇ ସାରା ଭାରତ ବର୍ଷରେ ଖେଳି ଯାଇଛି ଶୋକର ଛାୟା ।
ଏଠାରେ ସୂଚନାଯୋଗ୍ୟ, ଶାରୀରିକ ଅସୁସ୍ଥତା ଯୋଗୁଁ ଗତ ସାଧାରଣ ନିର୍ବାଚନରେ ପ୍ରତିଦ୍ବନ୍ଦ୍ବିତାରୁ ଓହରି ଯାଇଥିଲେ ସୁଷମା । ଗତକାଲି (ମଙ୍ଗଳବାର) ଅସୁସ୍ଥ ଅନୁଭବ କରିବାରୁ ତାଙ୍କୁ ରାତି 9ଟା 35 ମିନିଟରେ ଦିଲ୍ଳୀ ଏମ୍ସରେ ଭର୍ତ୍ତୀ କରାଯାଇଥିଲା। ସେଠାରୁ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ ।
