ମୁମ୍ବାଇ: ମହାରାଷ୍ଟ୍ରରେ ବର୍ଷା ଜାରି ରହିଛି । ବନ୍ୟାରେ ବେହାଲ ମୁମ୍ବାଇ । ଲଗାଣ ବର୍ଷାରେ ମହାରାଷ୍ଟ୍ରରେ ଜୀବନଯାପନ ବ୍ୟାପକ ଭାବେ ପ୍ରଭାବିତ ହୋଇଛି । ଅନେକ ସ୍ଥାନରେ ମଧ୍ୟ ବ୍ୟାପକ କ୍ଷୟକ୍ଷତିର ସୂଚନା ମିଳିଛି । ବେଲଗାମ ଜିଲ୍ଲାରେ 150ରୁ ଅଧିକ ଘର ଭାଙ୍ଗିଥିବା ବେଳେ ଅନେକ ରାସ୍ତା ଧୋଇ ଯାଇଥିବା ସୂଚନା ମିଳିଛି ।
ପ୍ରବଳ ବର୍ଷାରେ ଜିଲ୍ଲାରେ ବେଙ୍ଗାଲୁରୁ-ପୁନେ ଜାତୀୟ ରାଜପଥରେ ବନ୍ୟା ଜଳ ପ୍ରବାହିତ ହେଉଥିବା ସୂଚନା ମିଳିଛି । ଫଳରେ ଏହି ରାସ୍ତା ଦେଇ ଯାତାୟତ ବନ୍ଦ ରହିଛି। ସେହିଭଳି ଆଙ୍ଗ୍ରୋଲି, ଲିଗ୍ନାମଥା, ଚୁଞ୍ଚ୍ବାଡ଼ା, ଏବଂ ଦେବଲାଠି ଗାଁ ମଧ୍ୟ ବିଶେଷ ଭାବେ ପ୍ରଭାବିତ ହୋଇଥିବା ସୂଚନା ମିଳିଛି । ଏହି ଗାଁ ଗୁଡ଼ିକରେ ଶତାଧିକ ଘର ଭାଙ୍ଗିଥିବା ଜଣାପଡ଼ିଛି । ଜଳମଗ୍ନ ଗାଁ ଗୁଡ଼ିକର ସ୍ଥିତି ପରଖୁଛି ପ୍ରଶାସନ।
ବନ୍ୟାଞ୍ଚଳକୁ ପ୍ରଶାସନିକ ଅଧିକାରୀ, ବିଡ଼ିଓ, ତହସିଲଦାର ଗସ୍ତ କରି ସ୍ଥିତି ପରଖୁଛନ୍ତି । ସେହିଭଳି ୟାମାଗର୍ନି ଗାଁ ନିକଟରେ କୋଲ୍ହାପୁର-ନିପାନି ରାଜପଥ ଉପରେ ମଧ୍ୟ ବନ୍ୟାଜଳ ପ୍ରବାହିତ ହେଉଥିବା ଜଣାପଡ଼ିଛି ।
